Mizoram MP in Myanmar buaina a sawipui

Mizoram Rajya Sabha MP, K. Vanlalvena chuan nimin khan India Vice President, M. Venkaiah Naidu chu hmuin tunhnaia Myanmar ram-a buaina thleng avanga mipuite harsatna chungchang a sawipui.

Mizoram Rajya Sabha MP, K. Vanlalvena hian Rajya Sabha Chairman ni bawk, M. Venkaiah Naidu chu a chenna In-ah kawmin Myanmar rama Democracy tundin tuma hmalatute chunga tawrhna nasa tak thleng mêk chungchang leh Mizoram mamawh thil pawimawh dangte a sawipui a. Myanmar ram buaina avanga sipai kut tuara thi leh hliam tam tak an awm tawh thu leh, mi tam tak jail-a khung an nih mek thu te, he buaina avanga thi leh hliam zat dik tak hriat theih a nih loh thu leh an la pun belh zel dawn nia a lan thu te sawiin, Myanmar sipai leh Police te zinga mi engemaw zat chuan Myanmar mipuite chunga kutthlak an duh loh avangin an ralthuamte surrender in civilian midang engemaw zat te nen inhumhimna zawngin Mizoram-ah an rawn tlanlut tawh tih a sawi a. Heng Myanmar atanga raltlan lolut te chhawmdawlna tur ngaihtuah a tul thu pawh thlenin, Myanmar mipuite chunga tawrhna titawp tura a tul dan anga hma la turin India Vice President chu an ngen a. Myanmar laka sawrkar laipui policy chu ennawn tula an hriat thu a thlen bawk a ni.

Rajya Sabha MP hi MNF Adviser, Rosangzuala chuan tawi-awmin India independent hnuah Union Public Service Commission Member-ah Mizoram mi pakhat mah an la awm ngai loh avangin UPSC-ah Mizo dah ve tura hma lakpui turin Vice President chu an ngen a. State puitling nih hnu kum 35-ah pawh Mizoram chu All India Civil Service-ah AGMUT Cadre hnuaia a la awm chu a hun tawh lovin Mizoram Cadre hran siam a hun tawh thu pawh thlenin, Staff Selection Commission hnuaia hna diltu ten Guwahati-ah kher exam ngai tawh lova Aizawl-a Exam Centre dah a nih theihna tur pawh ngaihtuah pui turin an ngen bawk a ni.