Latest News

AR te hun reilote ah an insawnchhuah ring

Land Revenue & Settlement (LRS) Minister, Lalruatkima chuan Aizawl-a Assam Rifle-te chu hun reilote hnuah an insawn chhuah a rin thu House a hrilh.

Nimin-a Assembly thutkhawm ah MNF Member, Dr. Vanlaltanpuia zawhna kalzelah Minister, Lalruatkima chuan Assam Rifles-te chu kum 2006 khan hectare 524-a zau Zokhawsang-ah ram pek an nih thu sawiin, an insawnna tur atana ruahman a ni tih a sawi a. Kum 2002 khan Aizawl-a Assam Rifles ram chu sawrkar leh vantlang in tha taka an hman theih turin dan siam a ni tih pawh sawiin, hei hi mimal thil tithei deuh te'n an neih lohna atan a nih thu a sawi bawk.

Revenue Minister chuan kum 2019 khan Assam Rifles-te hi Ministry of Home Affairs (MHA) chuan lehkha pein insawn tura ruahmanna siam rang turin an tih thu sawiin, “State sawrkar pawhin tih tur a nei ve a, Tui, Eng leh Kawng tha pek niin, tih zawh a ni tawh. AR-te'n harsatna pakhat chu Contractor-te'n duh angin hna an thawk chak thei lo hi a ni,” a ti a, State sawrkar chuan theihtawp a chhuah thu a sawi bawk. Ministry of Home Affairs chuan Assam Rifles-te hi March, 2020 khan May 2020-a Zokhawsang-a insawn tura tih an nih leh thu sawiin Lalruatkima chuan, “COVID-19 avangin thil a kal chak thei lo. Ka mimal ngaihdanah chuan hun reilote ah an chhuakin ka ring,” a ti a ni.

MZU Southern Campus hmun tur chungchangah Land Revenue & Settlement Minister chuan, “Campus atan hian Mausep ram, Pukpui VC area, Lunglei District chu Higher & Technical Education Department leh Pukpui VC-te'n an thlang a, mimal ram awmlohna nia hriat a nih avangin Aqcuired tura notification chhuah tawh chu ni 22.12.2020 khan revoked a ni,” a ti a, Land Lease dil tura HTE Department hmalakna nghah mek a nih thu a sawi bawk.

Comments

Chhiar Hlawhte