Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

YMA ten NH. 54 Keitum leh Bungtlang inkara hnathawh chawlhsan rih turin an ngen

Keitum leh Bungtlang inkar-a NH. 54 zauhna tura hna thawh mek chu nimin khan Serchhip Sub-Hqrs. YMA hruaitute chuan tlawhin hnathawh kallai chu chhunzawm tawh rihlo tura hnathawktute an ngen bakah NHIDCL lamah pawh an hnathawh chungchang hi thlen an tum thu an sawi.

Mizoram-a NH. 54 laihzauh leh siamthat hna thawh mekah hian hmun tam takah chuan kawngpui zauhna atan kawng chhaklam laih a nih bakah kawng thlanglam-ah lung remin kawng hi zauh a ni a. Niminpiah khan Keitum leh Bungtlang inkar-ah hian kawng siam hna thawktu Company lamin tui chawina atan hman Truck (Hyva) pakhat, lungrem hmanga kawngpui dawl zawl-a ding chu lungrem hian zo lovin a chim a, Truck pawh hi kawngthlang-ah thui tak a lum a, vanneih thlak takin nunna chan erawh an awmlo thung. Helai hmunah hian lungrem hi ft. 20 vel zet chimin a bul-a lungrem thenkhat chu a khik avang leh a foundation a tha tawklo nia a lan avangin nimin zing vek khan Company lam hian ft. 20 vel zet chu an thiah belh leh bawk tih kan thudawnna chuan a sawi a ni.

Hemi hnu nimin tlai khan henglai hmun-a hnathawh hi Serchhip Sub-Hqrs. YMA Vigilance & Monitoring Committee chuan tlawhin an enfiah a, YMA hruaitute chuan he hna hi BIPL te thawh a nih thu sawiin, hnathawh an en zinga a tam zawk chu a chhiat thu leh lirthei tan pawh la hlauhawm tur a nih thu sawiin, he hna thawk mektute chu an hna chawlhsan rih turin an ngen a, an thil hmuh dan chu NHIDCL-ah thlen an tum thu leh hnathawh tawh te pawh siamthat an phut dawn thu an sawi bawk.

Helai hmun hi Keitum VC te pawhin nimin zing khan an tlawh a, Keitum VC te chuan helai hmuna hnathawh hi a tir atangin an lo sawisel tawh thu sawiin, Company lama thuneitute bakah sawrkar thuneitute lamah pawh an lo thlen tawh tih an sawi a. Tuna an lungrem te chu a ding lutuk nia sawiin, tun aia awih (slope) tura an lo ngen tawh thu leh amaherawh chu an ngenna hian awmzia a neih loh thu an sawi a. Hemi hmalam pawh hian lungrem chim a lo awm tawh thu sawiin, Fur ruahtui tlak hunah phei chuan a hlauhawm thei hle dawn nia an hriat thu an sawi bawk.

Comments

Popular News (Last 30 Days)