Latest News

Raltlante lo enkawl leh chhawmdawl chungchangah sawrkar laipui ngaihchan a ni

Myanmar ram-a sipai sawrkar chet dan duhlohna lantir avanga mipuite nena inepna leh buaina awm chungchangah nimin khan Home Minister, Lalchamliana chuan Assembly Session-ah Statement siamin, raltlante lo enkawl leh chhawmdawl chungchangah sawrkar laipui ngaihchan mek a nih thu a sawi.

Home Minister-in Statement a siam danin, February ni 1, 2021 khan thenawm ram Myanmar-ah Myanmar Army in mipui thlan sawrkar dinglai sipai chakna hmanga paihthla in ram rorelna leh thuneihna anmahni an in pe a. Hemi ni atang hian National Emergency an puang nghal bawk a. Hetianga democracy palzut-a sipai ten thuneihna inpe chunga rorelna an kalpui mek avangin Myanmar ramchhung a hmun hrang hrangah dodalna leh duhlohna mipui ten an kalpui mek a. He thil a Myanmar Army leh anmahni dodaltu mipuite in beihna ah thi leh hliam pawh engemaw zat an awm tawh hi a pawi tak zet a, an ramah boruak muanawm leh tha awm thuai se a duhawm hle a ni, a ti.

Hetiang dinhmuna an awm avangin Mizoram chhungah Myanmar atanga raltlan rawn lut an awm tan a. Ramdang mi (foreigner) chungchang hi chu central sawrkar thu liau liau a nih avangin India sawrkar thu ngaihchan mek a ni tih Statement-ah chuan tarlangin, “Chutih rualin thuneitute thu pawh ngaichang hman lova Humanitarian crises avanga India/Mizoram lo lut te chu an nihna leh tul dangte fel taka record-in a tul dan anga chhawmdawl an ni ang. Hetianga raltlan lo lut te chhawmdawl zel dan tur chu sawrkar laipui kaihhruaina anga kalpui tur a ni ang,” a ti bawk.

India ramah hian Mizoram bakah Myanmar nena ramri nei State dang pathum Manipur, Nagaland leh Arunachal Pradesh te an awm thu pawh tarlangin, India leh Myanmar inrina (Boundary) hi KM 1643 a thui a ni a. Mizoram nen KM 510, Manipur nen KM 398, Nagaland nen KM 215 leh Arunachal Pradesh nen KM 520 a ni a. India hian 1951 United Nations Refugee Convention leh he Convention kaihruaitu 1967 Protocol te hi a zawm (join) ve loh avangin he Convention leh Protocol hian refugee chungchang ah India hi a phuar lo a. Hei vang hian raltlan (refugees) te hi tunlai Myanmar rama thil thleng avanga an awm zel dawn a nih chuan Mizoram chauh nilo in, heng State pathum avangin MHA thu ngaichang chunga kal a ngai ang, a ti bawk.

Comments

Chhiar Hlawhte