Patling pahnih mawng inhlim sak tawn vang a buai kan ni - Rosiamngheta

Mizoram Pradesh Congress Committee (MPCC)-a Secretary leh Aizawl Municipal Corporation (AMC) Councillor, Rosiamngheta chuan Patling pahnih mawng inhlim sak tawn vang a buai kan ni tih sawiin, Serchhip bial-a Assembly bye-election lo awm turah Serchhip bial mipuite chu PC. Laltlansanga Vote turin a sawm.

Serchhip bial-a Assembly bye-election neih tur atan nimin khan Serchhip-ah Campaign hun rawn hmangin MPCC Secretary leh AMC Councillor, Rosiamngheta chuan Serchhip Press Club-ah thuthar thehdarhtute a kawm a, he hunah hian Rosiamngheta chuan Lalduhoma chuan Chief Minister, Zoramthanga’n Peace Bonus tia alo sawi thin sum chu belchhian dawllo, NLCPR sum hmanga mipui bumna mai mai anih zia rawn sawiin, a mawng a hlim sak tih a sawi a. Zoramthanga hian a mawng hlimtu chu a hlim let sak ve leh tih sawiin, thiltih inang reng an nih avangin thlan tlak an awmlo ve ve tih a sawi a ni.

Rosiamngheta chuan Lalduhoma te thil tih dikloh sawiin, “ZPM in ti MLA zawng zawng hian an Nomination Paper-ah ZPM anih thu hi ziahlanna braket () tak ngial pawn pakhatmah a awm lova, a hmalama an lo infawmkhawmna leh an lo inteltualna te kha danin a hre lo, chuvangin Independent MLA dik tak an ni,” a ti a. “Independent MLA hian thlaruk chhungin an duh duh party an zawm thiang, Danin a phal thlap, mahse tumahin party an zawm lo. Party an zawm theihna hun a liam tawh a, an zawm loh chuan Independent MLA niin Neutral takin an term chhung kha an hmang tluan tawh mai tur a ni a, Party mal bik pakhat interest (Particular party) tan hman a thiang tawh lo, chu chu Independent MLA te dinhmun dik tak anih laiin Pu Lalduhoma hian hre reng leh luhlul takin, ‘ZPM tan mi thar ka lawm lut e’ te tiin a lo phusa ve leh sek bawk si a, Dan chu a bawhchhe ngei a, Dan siamtu dan bawhchhiat ching hi kan ram atang hian i um bo tawh ang u,” a ti bawk.

Rosiamngheta chuan beiseina dik (True Hope) leh beiseina bur ruak (False Hope) a awm thu pawh sawiin, “Kum 1966 atang tawh khan mipui auhkhawm leh pawl tih chak nan False Hope, Independence hi hman tangkai a lo ni tawh a, chu mi hmanga inhnuh kual zel chu tun thleng hian sim duhlo party an awm,” a ti a. “Takna (reality) neiin Mizoram hi an la kaihruai ngai lo a, mipui hip nan thawhrimna leh taihmakna inzirtirna aiin sum awlsam zawn inzirtirna ah kan ram a kal mek a, kan Budget te ngei pawh kan in enkawlna tur leh kan chanvo tur, ram ro siamna lam aia Central sum hai chhuah nana ‘a chi tur’ tiin Chiahpuam ang hialin kan sawi duh tawh a, Zoram mipuite moral tihchhiat zel tumna zirtirna diklo (heresy) lakah hian i fihlim ngam ang u,” a ti bawk.

Serchhip bial-a bye-election neih turah Serchhip bial mipuite chu takna nei thutlukna siam tura inbuatsaih ngam tura chahin, bial chhung mi ngei Candidate, PC. Laltlansanga chu Vote turin a sawm a. Ruling Party Candidate chu thlantlin ni mah se sawrkar a danglam phah dawnlo tih sawiin, thlantlin pawh nise tunhnaia Chief Minister in thu a sawi atangin ‘Hnam Run Dak Pu’ tur tho nia a lan thu a sawi bawk.

Thuthar thehdarhtute zawhna chhangin Rosiamngheta chuan Congress Candidate chu Serchhip bial mi a nih avanga beiseina an neih san thu pawh a sawi a, AMC inthlan neih zawh takah pawh anmahni Veng-ah chuan Vote an hmu tha tih a sawi a, kum upa lam thlantlin ai chuan la thalai zawk, hmalam hun la nei tha chu mipuite pawhin an thlan zawk a rin thu a sawi bawk a. Lalduhoma leh PC. Laltlansanga te chu Lalduhoma awmna bial, Aizawl West-I ah an lo inkhing tawh tih sawiin, Serchhip lamah chuan hnehna an chan ve ngei tawh an inrin thu a sawi a ni.