Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

World Consumers Rights Day hman niin SDCA in hnathawk tha chawimawina an dawng

Nimin March 15, 2021 khan khawvel pumah Consumers’ te dikna leh chanvo humhalh a tul zia inzirtirna ni, World Consumers Rights Day hman a ni a, Serchhip-ah pawh he ni pual hian hun hman niin Mizoram-a Consumer Association titha ber chawimawina chu Serchhip District Consumer Association te hnenah hlan a ni.

World Consumers Rights Day puala inkhawm hi Serchip-ah chuan nimin chawhnu khan Serchhip DIET Multipurpose Hall-ah neih niin he hun hi Serchhip District Consumers Association Vice President, Lalramlawma chuan a kaihruai a, he hunah hian Serchhip District Consumers Association President, H. Zonuntluanga chuan an pawl in Consumer te tana hma an lo lak tawhna thenkhat te tarlangin, Consumers ten harsatna an tawh changa a chinfelna tur, Consumers Court chu Serchhip-ah a awm thu leh he Court hian thubuai hrang hrang te pawh a lo ngaihtuah tawh thu a sawi a. Amaherawh chu Serchhip District in Chief Judicial Magistrate (CJM) chiah ala neih avangin CJM in a ngaihtuah theihloh thubuai a awm changa harsatna an tawh thin thu a sawi a, hei vang hian Serchhip District in District Session Judge emaw, Addl. District Session Judge emaw an mamawh thu a sawi bawk.

March 15 hi kumtin ‘World Consumer Rights Day’ atana hman thin a ni a, he ni hi kum 1962 March 15-a US President John F. Kennedy-a’n US Congress-ah thu a sawina ah Consumer rights chungchang a sawina ni niin khawvel ram hruaitute zingah hetiang ti awmchhun a ni a. John F. Kennedy-a’n Consumer rights chungchanga a hmalakna leh a ngaih pawimawhna hian Consumer movement hma a sawntir hle a, kum 1983 atang khan he ni hi ‘World Consumer Rights Day’ atan khawvel puma hman a lo ni ta a, Consumer te mawhphurhna chungchang leh thupui hrang hrang sawina hun atan hman thin niin kumin a World Consumers Rights Day-ah hian thupui atan 'Tackling Plastic Pollution' tih chu hman niin Serchhip-a he ni puala hun hman ah hian SDCA-a Asst. Secretary, K. Lalrinchhana chuan he ni thupui hmang hian thu a sawi bawk a ni.

World Consumer Rights Day pual hian Aizawl-ah chuan Supply Minister, K. Lalrinliana hovin Aizawl Central YMA Hall-ah hun hman niin he hunah hian Serchhip District Consumer Association chu Mizoram puma Consumer Association titha chawimawina, ‘Minister's Award for Best Performing District Consumer Association’ hlan an ni a, Serchhip District Consumers Association atangin chawimawina dawng tur hian Vice President, RL. Chhuanawma leh Secretary, Laldinpuia te kalin, he chawimawina hian thuziak leh pawisa fai Rs. 10,000/- a keng tel a ni.

Comments

Chhiar Hlawhte