Latest News

Inthlanna thianghlim, Lal Isua zuitu zia tilang ngam turin MPF ten mipuite an ngen

Serchhip bial-a Assembly bye-election neih tur chungchangah hian Mizoram People Forum (MPF) te chuan nimin khan Serchhip-a thuthar thehdarhtute kawmin inthlanna thianghlim, Lal Isua zuitu zia tilang ngam turin mipui, Candidate leh Party te an ngen tih an sawi.

MPF General Hqrs. leh MPF Serchhip District ten Serchhip Press Club-a thuthar thehdarhtute an kawmna hun hi MPF Serchhip District President, Rev. Zohmunmawia chuan kaihruaiin MPF General Hqrs. a Vice President, Rev. K. Lalrinmawia chuan MPF leh Political Party thawhhona thuthlung sawifiahin MPF din chhan te a tarlang a. Kohhran hrang hrang leh tlawmngai pawl hrang hrang thahnemngai ten kum 2006 June thla ah Mizoram People Forum (MPF) chu an din thu sawiin, inthlanna thianghlim leh boruak tha kan neih theih nan kan ram a Political Party hrang hrangte thawhpuiin thawhhona thuthlung te pawh an ziah thu a sawi a. Tunah chuan kan inthlanna te pawh a thianghlim tial tialin Party ten Candidate atan mi tha an zawng uluk telh telh a, amaherawh chu ual-au vak lova sum leh pai-a vote lei an awm thu erawh sawi ala awm thu a sawi a. “Inthlan dawn-a min hmangaih thar thut a, kan damlo te min kan avang leh, contract hna pek min tiam avang emaw, sawrkar hna sawipui/pek min tiam avang emaw ngawtin tumah i vote phah lovang u,” tiin “Tunhma, kha leh chena min vei ngai hleilo min rawn vei thar thut te hi hmangaihtu der an ni duh khawp,” a ti a, thilpek avanga Vote pe tu chuan a ram leh a hlutna a hralh nia sawiin, ‘Sum hmanga in vote lei an tum chuan an sum chu laksak ula, mi dang vote daih rawh u,’ ti-a mi fuihtu pawhin kawng dik lova mipui hruai a pawi ti lo tihna a ni bawk tih a sawi a. Hetiang fuihna hi Vote lei tumtu ang chauh bawka bumna chelek tura mite fuihna tho a nih thu a sawi bawk.

MPF Vice President chuan Voter tin in zalen taka ngaihtuahna an sen theih nan Party ten insawithaih leh invauna an chelek hauh tura nilo tih sawiin, Mipui kan rinawm phawt chuan Party ten ‘hmanraw thianghlim lo’ an hmang ngam lovang tih a sawi a, “Hmanraw thianghlim lo chelek duh chu ram leh hnam hmelma an ni zawk tih mipuiin i hria ang u,” a ti. Party dang leh elpui candidate sawichhiatna leh sawihnawmna ringawt thupui bera nei te chuan ram hmangih lovin lalna an hmangaih tih pawh sawiin, “Chutianga midang sawi-chhiatna tuipui bera neih chuan ram hmasawnna an ngaihtuah thleng lo,” a ti bawk.

MPF chu eng Party Unit mah ni lovin. eng party supporter mah a ni lo bawk tih pawh sawiin, “Eng Party pawhin ‘MPF nen kan tang ho, MPF hi kan Unit pakhat a ni mai,’ ti hialin sawi mah se dawt a ni. MPF hian tu Party mah duhsak bik leh thlauhthlak bik a nei lo. Dawt hmanga mahni rawn insawimawi an awm anih pawhin lo hnawl ngam ang che u,” a ti bawk.

MPF Adviser, Vanlalrema Vantawl pawhin thawhhona thuthlung chu zawm tum aiin pumpelh tum hramna a awm fo thin tih sawiin, “Thawhhona thuthlung tharah bawhchhe luite laka hmalak dan tur na zawka siam thar a ni a, bial chhunga puanzar mai bakah rampum media thlenga puanzar theih a ni tawh a. Ram rawngbawlnaa kan thawhpui media te tha chakna ringin a tul a nih chuan MPF lam chuan hei hi kan kengkawh tlat dawn a ni,” a ti bawk.

He hunah hian MPF General Hqrs. a General Secretary, Rev. R. Lalnuntluanga pawhin Social Media hman fimkhur a tul thu sawiin, mipui bum hmang an awm a nih chuan Election Commission ah te, CID Cyber Crime-ah te an hriattir nghal tur thu a sawi bakah mitin fimkhur turin a chah a. MPF chuan sum seng vak vak lo a hautak lo thei ang bera inthlan a duh avangin Flag leh Banner tar theih chin thuthlung anga zawm tur leh ruaitheh te pawh party te'n hruaihawt lo turin a ngen bawk a ni. 

Comments

Popular News (Last 30 Days)