Serchhip-a PMAY-HFA hnuaia In sak \anpuina dawng turte hmalak dan tur hrilhfiah an ni

PMAY-Housing For All hnuaia Serchhip khawpui chhunga In sak \anpuina dawng hmasa turte chu nimin khan Serchhip Auditorium-ah kohkhawm niin an In sak dan tur hrilhfiah an nih bakah intiamkamna ziahtir an ni a. Hemi hnu hian \anpuina dawn tur 1st Instalment chu pekchhuah nghal an ni ang.
Pradhan Mantri Awas Yojana-Housing For All hnuaia In sak \anpuina dawng hmasa ber turte tana he ruahmanna inhrilhfiahna hun hi UD&PA Department-a District Urban Development Officer, Vanthangpuii chuan kaihruaiin PMAY-HFA chu India Prime Minister in kum 2020, India ram zalenna champha vawi 75-na puala India rama chenna tur In neilo ten an lo neih ve na tura ruahmanna a siam a nih thu a sawi a. Tun \uma 1st leh 2nd DPR a tello, mi tam tak In leh lo la neilo leh mamawh tak tak an la awm a ni tih hriain tunah hian 3rd DPR siam leh mek a ni tih a sawi a. In sak hna chu \anpuina an dawn a\anga ni 15 chhunga thawh \an nghal tur leh ni 100 chhunga zawhfel ngei ngei tur a nih thu a sawi bawk.
He hunah hian Ramthianghlimi, MIS Co-ordinator, Rampansangi, Social Development Coordinator, Lalhmangaihsanga JE leh C. Lalhriatpuia JE ten Insak dan tur kalphung leh he Scheme in ruahmanna a siam te Powerpoint Presentation hmangin Beneficiaries kalkhawm te zirtirna an pe a. He hunah tarlan a nih danin PMAY-HFA hnuaiah hian India ram-a In leh lo la neilo ten Insak \anpuina tur Rs. 150,000/- dawngin 1st Instalment Rs. 60,000/- a bul \anin, a bang an pin zawh ah 2nd Instalment Rs. 60,000/- an dawng leh anga, Insak zawhfel anih hnuah 3rd Instalment Rs.30,000/- an dawng leh ang. Beneficiaries te hian a takin In an sa ngei em tih chu Satellite Geo Tagging Software Application hmanga vil reng an ni dawn a, he Scheme hian a duan ang chuan bul \an ni a\anga ni 100 chhungin In hi sak zawh tur a ni a, In len zawng hi a te berah a dung ft. 12 leh a vang ft. 28 ni tur a ni a, a ban leh Beam Structure chu RCC tur ni bawkin Skirting-ah Rangva emaw, Brick emaw hmangin a chung-ah Rangva (Galvanizing Sheet) hman tur a ni anga, Bed Room, Sitting Room, Choka leh Bathroom a awm ngei tur a ni bawk.
PMAY-HFA hnuaiah hian 1st DPR-ah hian In sak \anpuina dawng tur chhungkaw 1012 awmin a thawhkhatna ah hian \anpuina dawng tur a\anga za zela 40, chhungkaw 404 te hnenah In sak \anpuina hi pekchhuah a ni dawn a, a dang zaa 60 te pawh hian an la dawng vek dawn a. Tun \umah hian Serchhip-I a\angin mi 30, Serchhip-II a\angin mi 24, Serchhip-III a\angin 31, Serchhip-IV a\angin 5, Serchhip-V a\angin 23, Serchhip-VI a\angin 25, Serchhip-VII a\angin 78, Serchhip-VIII a\angin 23, New Serchhip South VC a\angin 39, New Serchhip North VC a\angin 46 leh Chhiahtlang VC a\angin mi 80 ten In sak \anpuina hi an dawng dawn a. Heng bakah hian North Vanlaiphai a\angin chhungkaw 137 ten \anpuina hi an dawng dawn bawk a ni.

Comments

Popular posts from this blog

PAN CARD an tih teh fo hi - Laldinpuia