Biate in Khawzawl District a awm an duh thu thlen

Nimin khan Biate Village Council leh Biate Welfare Society (BWS) Aizawl hruaitute chuan Chief Minister, Zoramthanga chu a Office-ah hmuin Biate khua-in Khawzawl District-a tel an duh thu leh District thar hnuaia Civil Sub-Division Office Biate khuaah dah ngei turin an ngen.

Nimin a Chief Minister an kawmna ah hian Biate khaw-tlang hruaitute chuan Biate khua chu tunhmaa khaw hlun leh khaw pawimawh a nih \hin thu sawiin, MNF Sawrkar-in a intiam ang ngeia District pathum - Khawzawl, Saitual leh Hnahthial District te a function tir mek chu lawmawm an tih thu an sawi a. Biate khua chu Champhai District chhunga awm a nih laiin, MLA Constituency-ah Serchhip District hnuaia Hrangturzo Bial-ah an awm thung tih sawiin, kawng tam takah an dinhmun a laklawh hle tih an sawi a. Tuna Khawzawl District thar lo piangah hian Biate khua chuan lungrual tak leh nghakhlel takin he District thar chhungah hian awm ngei an duh thu leh Sawrkar tha ti chak thei tur zawnga ke pen pawh an duhdan a nih thu an thlen a ni.

Biate khawtlang hruaitute chuan, Khaw-zawl District thar lo piang tur chu Biate leh a chhehvel khua te tan hmasawnna ropui tak thlentu a nih ngei an beisei thu pawh Chief Minister hnenah hian thlenin, District thar Function chho mekah an khua chuan SDO (Civil) neih ve ngei an duh thu leh kawng tam tak an ngaihtuah pawhin an phûin, an awmna lai (location) pawh a inhmeh hle tih an sawi a. “I Sawrkar zahawm tak hian he kan thil thlen hi min ngaihtuah sak a, min tihhlawhtlin sak ngei kan beisei tlat a ni,” an ti bawk.

Chief Minister, Zoramthanga chuan Biate khawtlang hruaitute thil thlen chu a \ul anga hmalak sak tur leh ngaihtuahna a lo neihpui tur thu a sawi a. Hemi hnu hian Minister dang te pawh hmuin an thil duh hi an thlen bawk a ni.