Adviser to Chief Minister in Serchhip-a leimin avanga chhiatna thlenna hmun a tlawh

Adviser to Chief Minister, C. Lalramzauva chuan nimin khan Serchhip rawn tlawhin tunhnaia ruahsur nasa avanga chhiatna tuartute a tlawhkual a, vanduaina tawk te hnenah \anpuina a hlan nghal bawk.

Adviser to Chief Minister, C. Lalramzauva hian nimin zing khan Aizawl a\anga Serchhip rawn thlengin Serchhip Tuikhuah Veng-a UPC (Mz) Hebron Biak In leh a chhehvel leikhi leh lei tlahniam te tlawh hmasa berin hemi hnu hian Serchhip Chhim Veng-a lei tlahniam a tlawh leh a. Hemi hnu hian Tarpi tlangpang-a lei tawlh in chenna In a tihchhiat tlawh lehin chhiatna thlen dan te a enfiah a. Serchhip Saron Veng-a leimin leh lei tawlh avanga chenna In luahlai pakhat leh sak lai pahnih chhia te pawh tlawh lehin Serchhip Vengchung-a leimin leh leikhi avanga mahni chenna In chhuahsan te pawh a tlawh bawk a ni. Adviser to Chief Minister, C. Lalramzauva hian leimin leh lei tawlh avanga chenna In luahlai leh saklai chantu mi pali (4), Zabiaka (Chanmari Veng), F. Sawithanga (Saron Veng), R. Lalduhawma (Saron Veng) leh Joseph Topno (Dinthar Veng) te hnenah Rs. 10,000/- \heuh hlanin leimin in an \henawm te In a hnawl avanga an In engemaw zat chhia, Rochungnunga, Chanmari Veng te Rs. 1500/- a hlan bawk a, hei bakah hian Serchhip-I leh II Village Council te hnenah hnatlang thingpui lumna leh a \ul apianga an hman turin Rs. 3000/- ve ve a hlan bawk.

Adviser to Chief Minister, C. Lalramzauva chuan tunhnaia vanduaina thleng tuartute chu a tawrhpui thu sawiin, kumtina che \hin, Serchhip Tuikhuah Veng-a National Highway-54, kawngpui chhuat tlahniam \hin chungchanga sawiin, helai lei che \hin hi a bul\hut a\anga siam\ha tura sawrkar-in hma a lak tawh \hin thu leh tun thlenga tih hlawhtlin ala nih loh thu sawiin, MNF sawrkar alo din phat khan helai hmun hi Serchhip-ah chuan ngaih pawimawhawm a nih avangin sawrkar pawhin a ngaih pawimawh thu a sawi a, tun dinhmuna helaia lirthei te chi tana kal harsa chu PWD National Highway thuneitute telephone hmanga bia-in, PWD thuneitute hian a rang lama siam an tum thu an rawn hrilh nghal a ni.

Hetihlai hian tunhnaia ruahsur nasa avanga Serchhip-I Village Council huamchhunga vanduaina thlenga In chhia te senghawi hna chu nimin khan hnatlang-a thawh chhunzawm leh a ni a. Serchhip-I Village Council te hian niminpiah khan hnatlangpui nei tawhin an la zawhfel loh avangin nimin khan hnatlangpui hi neih leh a ni a, he hnatlang-ah hian mi 150 chuang zet thawkchhuak lehin nimin lama In chhia an \hiah tak chak te senghawia dahfel a nih bakah R. Lalduhawma te In sak lai chhia-a a chak hlui te lakchhuah a ni bawk a. He hnatlang-ah hian Govt. Serchhip College NSS Unit a\angin Volunteer te pawh rawn thawkchhuakin Serchhip Pik-Up Owners Association ten In chhia senghawia bungraw thiar ngai te thiarin hnatlang-ah hian an thawk bawk a ni.