Durtlang-a vanduaina thlenna CM in a tlawh

Niminpiah tlai-a Durtlang BSUP Complex-a vanduaina thlenna hmun chu Chief Minister, Zoramthanga chuan nimin zing khan tlawhin chhiatna thlen dan a enfiah a. He vanduaina avanga BSUP Complex-a awm te sawnchhuah bakah hliam tuar enkawl mek leh nunna chan te a tlawh bawk.
Heng vanduaina thlenna hmun hrang hrang tlawhtu Chief Minister chuan he thil thleng hi vanduaithlak a tih thu sawiin, mihring tih theih piahlam thil thleng te pawh nia a lan thu a sawi a. A bika mi harsate chenna tura In sak hi a chhakah pialtlep lianpui, tui tam em em na hmun tan hmawk zawl-a sak a nih thu sawiin, Ruahtui a lo tam khan tawlhin chu chuan In hi a rawn su ta a nih thu leh In sak pawhin dawl zawh ngaihna a awmlo tih a sawi a. Chhiat tawkte tan sawrkar chuan theihtawp a chhuah dawn tih sawiin, mimal emaw, sawrkar emaw, tu pawhin In a din dawn chuan fimkhur pawimawh a tih thu a sawi a. He vanduaina avanga nunna chan ta mi pathum leh hliam tuar mi 8 te chu sawrkarin tihdan phung pangngai a neih zulzuia puih an nih tur thu sawiin, nunna chan te hi cheng nuai 4 pek \hin an nih thu leh hliam tuar te pawh an nat dan a zirin cheng nuai 2 thleng sawrkar in an inenkawlna tur puihna a pek \hin thu a sawi bawk.
Chief Minister chuan he chhiatna thlenga mi \hahnemngaite inpekna chu fakawm a tih thu sawiin, a bik takin Durtlang leh Leitan leh a chhehvel a mipui leh tlawmngai pawl hrang hrang ten tha an thawh dan te, zan a ruang tlaivarpuia an inpekna chu ropui a tih thu a sawi a. Disaster Management thawktute leh, a bik takin State Disaster Response Force ten mumal leh felfai taka hma an lak dan chu fakawm tiin an chungah lawmthu a sawi bawk.
Chief Minister in Durtlang BSUP Building Complex-a chhiat-rupna thlenna hmun a tlawhnaa Chief Secretary hova hmalak chhunzawm dan tur ruahman tura a beisei dan angin UD&PA Department, Disaster Management & Rehabilitation Department leh Geology and Mineral Resources Department te chu nimin vek khan \hukhawm nghalin an thu rel chu nimin chawhnu khan Chief Minister Pisa-ah report pein sawrkar mi pawimawh te chu an \hukhawm nghal a. Leitawlh in BSUP building pathum a hnawl chhiat bakah helai hmuna In la dinglai luahtu zawng zawngte chu Fur in a chim dawn avanga an him tlan zawk nan a remchan dan ang zela sawnchhuah dan tur ruahmanna siam relin, helai hmun venhim hna thawk tura a thei thei \anrual a thawhho chungchang leh Technical Investigation nei a chik taka a hmun pumpui a enfiah a, a hlauhawm dan te zirchian ni bawk se an ti a. Durtlang BSUP building chu a structure a ngheh \hat viau avangin na taka sut tawk mahse a chhe tlem zawk niin an sawi bawk.

Comments

Popular posts from this blog

PAN CARD an tih teh fo hi - Laldinpuia