Health Minister in Hrangturzo bial fang chhunzawm

Serchhip District tlawha rawn zin Health Minister, Dr. R. Lalthang-liana chuan Inrinni khan Hrangturzo bial chhunga khaw hrang hrang Bawktlang, N. Mualcheng, E. Lungdar, Biate leh Kei\um te a tlawh.

Health Minister hian Bawktlang khua tlawh hmasa berin an khawtlang in Health Clinic atan cheng nuai 7 senga In an lo sak fel tawha thawktu dah tura an lo dil chu a ngaihtuah sak tur thu a hrilh a. An mamawh dang dilte pawh a \ul anga a umzui pui tur thu a hrilh bawk. Hemi hnu hian North Mualcheng tlawhin khawtlang hruaitu ten Sub-Centre building thar leh Staff Quarters an lo dil chu a theih anga a bawhzui sak tur thu hrilhin amah \awiawmtu Health Department Officers ten Sub-Centre hmunhma hi an tlawh nghal a ni. Minister chuan Sub-Centre aia changtlung zawk, B.Sc Nursing awp tur, Health & Wellness Centre engemawzat din thar a ni dawn tih a sawi bawk.

Hemi hnu hian East Lungdar tlawh lehin E. Lungdar-a Martar Thlanmual-ah Remna Ni pualin zahna pangpar a dah a. He thlanmualah hian Laldenga telin mi 18 hriatrengna siam a ni a. E. Lungdar PHC tlawh zui nghalin hun engemaw chen Doctor nei lova E. Lungdar PHC a awm hnuin tunhnai maiah Doctor thar dah a ni ta a. Doctor baka hnaruak la awm te pawh sawrkar chuan engemawzat lak tumin ruahmanna siam a, budget pawh engemawzat dah a ni, a ti. Health lama thawktute tihchak mai bakah Health Care Scheme \ha zawk nei turin ruahmanna lian tham tak duan mek a nih thu a sawi bawk.

Health Minister hian Biate khuaa Samuel Tea Factory tlawhin Factory neitu, Lalthanpuia leh Biate-a Thingpui ching Association hruaituten an lo dawngsawng a. Thingpui chingtuten Thingpui zik an hralhna, Kg. 1 Rs. 15 chu an tan a hlawk zo lo hle tih lo hrilhin, chhungkaw 300 chuang Thingpui huan nei an awm laiin chhungkaw 30 vel chauhvin tunah hian Thingpui an sik peih tih an sawi a, hei vang hian Price Support kg 1. ah Rs. 5 tal sawrkarin pe turin an lo dil a ni. SEDP hnuaiah Biate-a Thingpui chingtu zawng zawng ten phur tak leh hlawk taka an thingpui huan an kalpuia, an enkawl ngei theihna tur ruahmanna siam an tum tur thu a sawi bawk.

Hemi hnu hian Zialung Community Hall-a amah lawmna hun chu hmanpui nghalin hriselna lamah hma kan sawn theih nan mitinin mawhphurhna kan nei vek a. Hospital leh Medical Centre te pan ngai lova nun hrisel neih tuma hmalak uar deuh deuh a \ul takzet a ni, a ti a. May, 2019-a Sample Registration System Survey report a tihchhuah thar ah Mizoram Infant Mortality Rate (IMR) chu 15-ah a tla thla a. Kum 2010-ah kha chuan 37 lai kan la ni tih sawiin, hei hi thil lawmawm leh chhin-chhiah tlak a nih thu a sawi bawk. Hemi hnu hian Health Minister hian Biate PHC tlawh lehin Kei\um Sub-Centre a tlawh bawk.