Eirukna sual avangin MNF sawrkar hi tla thei reng dinhmunah a ding mek - Lal Thanhawla

Mizoram Pradesh Congress Committee (MPCC) President, Lal Thanhawla chuan sawrkar dinglai chuan a term a hmang ral dawn lo nia sawiin, “Eirukna sual avangin MNF sawrkar hi tla thei reng dinhmunah a ding mek a.An hotupa tiamin MNF hruaitu lawkte chuan eiruk thubuai pahnih pathum an nei a, lung In tang thei reng an ni,” a ti.
MPCC in nimin-a Aizawl Congress Bhavan-a Friday Political Session-a an hruaitu thlan tharte hnena thlantlin an nih puanna Certficate hlanna an neih ah MPCC President, Lal Thanhawla chuan he thu hi sawiin an Party inthlan neih zawh tak buaipuitu College Zirtirtu tam takin an phur dan chu mak an tih thu leh an rin aia an lo phur thu a sawi. MPCC President chuan MNF khan kum 1998-2008 an sawrkar chhung khan contractor-ho hnen a\angin 3% an la \hin tih sawiin, an sawrkar chhung chuan Congress mipuite hmangin Mizoram-ah malsawmna tam tak Pathian in a thlentir thung tih a sawi a. Congress party aia hmasawnna thlen tir nasa an la awm lo tih sawiin, “Kan policy leh programme reng reng hi Pathian lam\ang a ni a. NLUP pawh tuten emaw sawisel \hin mah se Pathian lam\ang programme a ni a. Mi tam tak tana malsawmna a ni. Party dang hruaitute’n Sawrkar laipuiah zuk hek mahse an hlawhtling lo. Congress Ministry chhungin Mizoram GSDP a sang em em a. He ram hi hmasawnna lama kaihruai turin Congress mipui lo chu an awm lo tih finfiah a ni tawh a. Mite tana malsawmna ni tura \an lak zel hi Congress mipuite thil tum ber lo ni zel teh se,” a ti bawk.
He hunah hian MPCC Treasurer thar, Zodintluanga pawhin thu sawiin, “Congress party kan tlak tirh khan ‘MNF hi an la sawrkar thar em mai, i bei lovang u, tihian an kal kalin kal se, inpal hnawk se, nakinah in bei dawn nia’ tia thurawn min petute pawh an awm. Mahse, ngun taka kan ngaihtuahin, Mizoram Budget an siam dan te, Supreme Court thuchhuak palzut chunga MR-a zirtirtu lak an tum dan te, Mizo \halai lehkhathiamte hmangaih miah lova MPSC thuneihna an chhuhsak dan te, an kutchhuak ni miah lo MIMER hming an thlak ringawt dan te kan ngaihtuahin Mizoram hmangaihtu dik takte tan chuan MNF sawrkar kal dan hi ngawihpui mai mai chi a lo ni lova, Mizoram an sawpchhiat vek hmain MNF sawrkar hi kan paihthlak a ngai a, chu chu khua leh tui tha te tih tur pawh niin a lang,” a ti a. Inthlanpui-a an tlak hnuah pawh Congress Bhavan chu a lun em em reng tih sawiin, “Opposition Party Office a ni tih a hriat loh. Kum 1998 a kan tlaka kan dinhmun nen chuan tun \um hi danglam tak a ni a; chuvangin, Congress party hi kan tho leh vat dawn tih a chiang hle,” a ti bawk.

Comments

Popular posts from this blog

PAN CARD an tih teh fo hi - Laldinpuia