MPCC President-ah Lal Thlanhawla thlang

Nimin-a MPCC President Room-a MPCC Extended Meeting chuan MPCC President atan Lal Thanhawla an pawm bakah, Vice President atan H. Liansailova leh Treasurer atan Zodintluanga te an pawm bawk.

MPCC Election Chairman, Albert Lalthlamuana sawi danin, MPCC OB Meeting chuan an party kaihruai zel turin Lal Thanhawla an rintawk bakah a kaihhruaina a an lungawi thu leh an party kaihruai zel tura an la duh thu an lo pass tawh a. Lal Thanhawla chu Party President ni chhunzawm tur leh Vice President leh Treasurer pawh a thuneihna a ruat turin an lo pass tawh bawk a. MPCC OB thu ang hian Lal Thanhawla chuan Party President a nihna angin Vice President atan MPCC Treasurer nilai H. Liansailova chu a ruat a. Treasurer atan CLP Leader leh Thorang bialtu MLA nilai, Zodintluanga chu a ruat bawk a ni.

MPCC OB thu pass leh Party President in a OB pui tur a ruat te hi nimin khan MPCC Extended Meeting-ah pharh niin, MPCC Extended Meeting hian he rawtna hi lungrual takin an pawm a. MPCC President, Vice President leh Treasurer tur hian Nomination an file nghal a ni. Tun thla ni 24-a MPCC hruaitu thar thlanna neih tura Nomination file hun hi nimin tlai dar 3:00 khan a tawp a ni. MPCC President Lal Thanhawla, Vice President H.Liansailova leh Treasurer Zodintluanga te hian MPCC Extended meeting pawmpuina anga chuhpuitu an neih tak loh avangin hian, MPCC  Executive Member tur Mipa 50 leh Hmeichhia 10, an vaiin mi 60 thlan an ni dawn a. MPCC Executive hi mi 91 in an chuh dawn a ni.