Serchhip RD Block huamchhunga VEC tan VB-G RAM G chungchang zirhona neih a ni

Serchhip RD Block huamchhunga Village Employment Committee (VEC) te tan nimin khan Viksit Bharat – Guarantee for Rozgar and Aajeevika Mission (Gramin) chungchangah Orientation Training neih a ni.

Viksit Bharat – Guarantee for Rozgar and Aajeevika Mission (Gramin) chungchang VEC te tana zirhona Serchhip BDO Conference Hall-a neih hi Serchhip BDO Dr. Lalramdintluanga chuan kaihruaiin VB-G RAM G chu thla thar July 1 atanga hman tan a nih dawn thu leh MGNREGA thlakna tur a ni tih sawiin, thil danglam lian lutuk a awm lo mah se a hma nena inang lo hret hret a awm ve bawk avangin mipui ten an hriatchian theih nan hetiang hun hi buatsaih a nih thu a sawi a. He huna tel tura sawm thuthar thehdarhtute pawhin mipuite hnenah he ruahmanna thar chungchang hi lo thehdarh tura chahin, mipui ten an hriatchian theih nan theihtawp lo chhuah se a duh thu a sawi bawk a ni.

Serchhip BDO Dr. Lalramdintluanga chuan he huna kalkhawmte hnenah hian VB-G RAM G chungchang hi sawifiahin MGNREGA nena a danglamna tlangpui a sawi a. Mipuite tan kum khat-a ni 125 inhlawhna siamna tur a nih thu te, mipuite tana inhlawhna siam chu a tum a nih rualin India ram in kum 1947-a ram changkang tawh (Developed Country) nih a tumna tinzawn chunga khawtlang leh ram rotling (assest) siam chu a tum ber a nih thu a sawi a. He hmalakna atana sum zawng zawng chu Central sawrkar leh State sawrkar in 90:10 a an intum sem tur a nih dawn thu leh a hma ang bawkin Gram Sabha in hnathawh tur a duan leh tur thu te a sawi a. MGNREGA-a ‘Job Card’ awm thin chu ‘Gramin Rozgar Guarantee Card’ (GRG Card) tih a nih dawn tawh thu leh hnathawktute pawh Gramin Rozgar Worker tih an nih dawn thu a sawi a. He hmalakna a sawrkar laipui-a thuneitu ber chu Central Gramin Rozgar Guarantee Council (CGRGC) niin State-ah chuan State Gramin Rozgar Guarantee Council (SGRGC) a nih dawn thu a sawi bawk.

VB-G RAM G hnuaiah hian hnathawh theih (Permissible Work) 316 zet a awm thu pawh Serchhip BDO chuan sawiin, heng te hi uluk taka lo zirchiang tur leh an khaw tana mamawh tur lo ngaihtuah lawk turin a chah a. June 29, 2026 hmain VC Area tinah Gram Sabha neiin hetah hian kumin chhunga an hnathawh tur thlan a tul leh dawn thu sawiin, tuna an thehluh bak chu tun sawrkar kum chhunga thun belh theih a nih dawn loh avangin hnathawh tul thei tur ang zawng zawng chu lo thun a tul thu te pawh a tarlang bawk a ni.

Nimin-a he hun hman ah hian Serchhip BDO Office-a MGNREGS hnuaia thawktu hrang hrang ten VEC Member te hi an hnathawh dan hrang hrangte an hrilhfiah nghal bawk a, Serchhip RD Block huamchhung khaw hrang hrang atangin VEC Member an tel tha hle a ni.