Kumin ah ASF vanga Vawk thi leh suat 1571 a awm tawh
Serchhip-a AH&Vety Department ten an chhinchhiahna atanga a lan danin nimin khan Serchhip District-a khaw pali ah ASF avanga Vawk thi 18 awm belh lehin heng zinga 9 chu Chhingchhip-ah a ni a, Hriangtlang-ah Vawk thi 6 awmin Chhiahtlang-ah pahnih leh Serchhip P&E Veng-ah pakhat te an ni a, heng te nen hian kumin chhungin Serchhip District-ah ASF vanga Vawk thi hi khaw 18-ah 934 lai a awm tawh a ni. Nimin vek khan khaw pathum-ah ASF hri leng darh zel tur venna atana Vawk suat 21 a awm bawk a, heng zinga 11 te chu Serchhip P&E Veng ah niin Chhingchhip-ah 8 leh Hriangtlang-ah 2 suat a ni bawk a ni.
Kumin chhung hian Serchhip District-a Veng leh khua 18-ah ASF hri leng hi hmuh a ni tawh a, chhungkaw 355 ten hri leng hi tuar tawhin Vawk 934 a thih tawh bakah hian Vawk 637 suat a ni tawh bawk a, kumin chhung hian Vawk thi leh suat 1571 zet a awm tawh a ni.
Serchhip District-a khua leh Veng hrang hrang zingah Serchhip Vengchung chu ASF tuar nasa ber ni mekin Vawk thi 94 leh suat 118 awm tawhin a vaiin Vawk thi leh suat 212 a awm tawh a, Serchhip P&E Veng-ah Vawk thi 115 leh suat 50, a vaiin 165 a awm tawh bawk a, Serchhip Kawnpui North-ah Vawk thi 116 leh suat 44, a vaiin 160 awmin Chhingchhip-ah Vawk thi 69 leh suat 79 a awm tawh bawk a ni.
Kumin hian ASF hi Serchhip Town pawn lamah Chhingchhip, Khumtung, Ngentiang, Lung-pho leh Hriangtlang-ah te hmuh a ni tawh a, Ser-chhip Town chhung bikah chuan ASF hri leng hian ziaawm lam a pan hret hret nia a lan laiin District chhung khaw dangah chuan he hri hi ala darh zel niin a lang a, Vawk thi leh suat ala awm belh deuh reng a ni.