Assam Rifles ten MUP tan TB natna zirhona buatsaih

Serchhip-a awm 8th Assam Rifles te chuan Inrinni khan Mizoram Upa Pawl (MUP) Member te tan Tuberculosis (TB) natna chungchang zirhona an buatsaih.

MUP Sub-Hqrs. Serchhip Office, Serchhip Bazar-a TB natna chungchang zirhona hun hi MUP Sub-Hqrs. Serchhip President, CL. Ramngaia chuan kaihruaiin 8th Assam Rifles-a an Doctor, Mahesh Kumar Barnwal chuan he huna kalkhawm te chu zirtirna a pe a. Dr. Mahesh Kumar Barnwal chuan TB natna chu taksa a natna dotu chak tawkloh avanga kai theih a nih thu sawiin, boruak-a a hri leng kan hipluh hnuah kan taksa a natna dotu lo chak tawk loh avanga awlsam taka kai theih a nih thu leh taksa ah natna dotu a chak erawh chuan chung te chuan a hrik hi lo hnehin taksa ah nghawng a neilo thung tih a sawi a. Amaherawh chu mihring kan lo upat hnuah chuan taksa te alo chak tawhloh avang leh Zu leh ruihtheih thil ti \hin te tan chuan awlsam taka kai theih a nih thu sawiin, chawlhkar hnih aia rei khuh nei te tan chuan mithiam te rawn vat \hin a pawimawh thu a sawi a. TB natna vei te chuan enkawlna damdawi \ha taka an ei chuan awlsam taka enkawl dam theih a nih thu leh amaherawh chu damdawi ei \ha lo leh enkawl lo tan chuan awlsam taka thihpui theih a nih thu a sawi bawk.

He hunah hian MUP member te chuan hetianga Assam Rifles ten TB natna chungchang zirhona an buatsaih sak chu lawmawm an tih thu sawiin, upa lam ten harsatna an tawh, Mit leh Beng lama harsatna neite tana inentirna te buatsaih ni thei se an duh thu an sawi chu Dr. Mahesh Kumar Barnwal chuan September 1-a an Battalion Rising Day hmain buatsaih leh an tum tur thu a sawi a. Hemi hmalamah hriselna dinhmun enfiah sak mamawh an awm a nih chuan Assam Rifles Unit Hospital-ah pan theih reng an nih thu sawiin, a theih anga enkawlna \ha an lo pek tur thu a sawi bawk.