Ruahsur avangin In 2 chhe tawh, In sak lai 3 chhia, chhungkaw 9 inthiarchhuak tawh

Tunhnaia ruahsur nasa avanga Serchhip-a chhiatna thlengah chenna In luahlai pahnih chu luahzui tlak loha chhe tawhin In saklai pathum te pawh sak chhunzawm tlaklohin a awm tawh a. Chhungkaw 9 in an bungrua thiarchhuakin chenna In an chhuahsan tawh.

Kar kalta Inrinni a\anga han mang lova ruahsur nasa avang hian Serchhip khawpui-ah chhiatna chi hrang hrang a thleng mek a, hriat theih chinah Nilaini tlai-a Serchhip Chanmari Veng, Nursing School Road-a Zabiaka te chenna In a chhiat vek bakah Serchhip Saron Veng-a F. Sawithanga te chenna In chu luahzui tlak lohin a chhe tawh a, F. Sawithanga te chenna In hi Nilaini tlai a\ang khan a chet tawh avangin an bungrua chu hmun him lamah thiarchhuah a lo ni tawh a, hemi hnu hian che zui zelin tunah chuan luahzui tlak lohin a chhe tawh a ni.

Saron Veng mawng lam lei che avang hian Saron Veng huamchhunga chhungkaw pathum ten chenna In an saklai chu chhunzawm tlak lohin a chhe tawh bawk a, heng te hi R. Lalduhawma In te, Lalneihzami In leh Joseph Topno te In a ni a, heng In te hi RCC-a sak vek niin chhunzawm tlakloh khawpin a chhe tawh a ni. Helai hmuna leimin avang hian a chhak lam Saron Veng huamchhunga K. Vanlalvena In leh Kawlhnuna te In bakah a chhaklam Vengchung huamchhunga Rothangvunga te pawhin an bungrua an thiarchhuak a, helai hmuna leimin avanga In chhia in a hnawl tel theih hlauhthawn thu-ah Serchhip Dinthar Veng, Thumbawk lui bula H. Kaptluanga (L) In luahtu chhungkaw 4- Lalhruaitluangi, R. Lalawmpuii, C. Chawngliana leh H. Lalpekhlua te pawhin an bungrua thiarchhuakin an In hi an chhuahsan tawh bawk a ni. Serchhip Dinthar Veng-a Thlansanga te In, chhungkaw pahnih luahlai pawh dinhmun hlauhthawnawm takin a awm mek bawk a. An Inhnuai luahtu Lalhlira te chu an In chhaklam a\anga chirh tawlh avangin an In hi luahzui theih lohin an bungrua thiarchhuah a ni a, a chunga Thlansanga te pawh hian an bungrua engemaw zat an thiarchhuak bawk a ni.

Tunhnaia ruahsur nasa avang hian Serchhip Tuikhuah Veng-a NH. 54 kawngpui chhaklam pawh min lehin kawngpui hi a hnawh a, helai hmunah hian JCB dahin leitla te hi thenfai nghal zel a ni a, hei vang hian lirthei a veivak te tan erawh harsatna lian lutuk thleng a awm lo a. Mihring tan erawh kalkai a harsa thung a ni. Serchhip Tuikhuah Veng-a NH. 54 tlahniam \hin pawh tunah hian a khi leh \an mek a, lirthei tan kal harsa la ni lo mah se a thlanglam-a UPC (Mz) Hebron Biak In chhaklam pawh a chet leh tawh avangin ruah hi a sur zui zel a nih chuan mipui tana hlauhawm ni thei tura ngaih a ni bawk. Heng bakah hian Serchhip leh Thenzawl inkar te, Serchhip leh Kei\um inkar te, Kei\um leh Khawlailung inkarah te pawh leimin in kawng a hnawh zeuh zeuh bawk a, heng te hi PWD lam chuan a theih anga thenfai hna thawk nghal zelin lirthei tangkhang buaipui ngai lutuk erawh a awm rihlo nia thudawn a ni bawk.