Chhungkaw 4263 te Mizoram mi tih finfiah a ni

Tripura Relief Camp 6-a Bru awmte endik hna thawh hnihna chu Inrinni khan zawhfel a ni a, chhungkaw 4,263 chu Mizoram mi ngei an ni tih fiah a ni.

Tun thla ni 3 a\anga Mizoram khua leh tui Bru Tripura Camp 6-a awmte, Mizoram a hruaikir turte finfiah nawnna hi tum lawk angin a huna zawh fel a nih thu Home Secretary, Lalbiakzama chuan a sawi a. Tripura Relief Camp a zuk kal Official-te hian Nilaini khian Aizawl-ah Bru laklet hna kalpui dan tur sawihona ah report an pe dawn ni a thudawn a. A hmuna zuk kal Official-te hian Mizorama lokir duh tur an chhinchhiah nghal a, tun dinhmunah chuan Mizoram mi nia an pawm chhungkua te hi chuan an lokir duh thu an sawi vek a. Sawrkarin lak kir hna a thawh hunah an kir tak tak dawn leh dawn loh erawh chu a hriat chauh dawn a ni.

Hetihlai hian tunhnai khan Mizoram Bru Displaced People’s Forum (MBDPF) chuan Chief Minister, Zoramthanga hnenah lehkha thehlutin thil ngiat thar an nei a. Mizorama an lokirna tura thu delhkilh an siam thar zingah lokir tur chhungkaw engemaw zatin an duh ang tawk ram an neih theih dawn loh avangin chung hote chu Lunglei emaw, Lawngtlai District-ah emaw dah mai zawk ni se tiin an ngen a, thil an ngiat dang pawh tarlan a ni. Sawrkar chuan Bru te hi an chhuahsan khua a an kir leh a rem lo a nih pawhin an chhuahsan Assembly bial chhungah ngei inbenbel tir leh vek tura thutlukna siam a nih tawh avangin MBDPF te thil ngiat hi a hnawl nghal ni a thudawn a ni.