Serchhip District Coordination Committee on FOCUS in FOCUS hmalakna leh hmachhawp an thlirho

Serchhip District Coordination Committee on FOCUS chu nimin khan an Chairman, Serchhip District Bawrhsap Sangchhin Chinzah hova a Office-ah \hukhawmin an hmalak tawhna te an thlir bakah hmalak zelna tura ruahmanna te an thlirho a. Vawk leh Sial vulhna lama hmalakna tura ruahmanna te chu pawm a ni.

Serchhip District Bawrhsap Pisa-a Serchhip District Co-ordination Committee on FOCUS \hutkhawm ah hian FOCUS Serchhip District Project Manager leh DAO ni bawk, C. Lalnithanga chuan FOCUS hnuaia Serchhip District a hmalak tawhna report pein, kumin April a\anga June chhung hian Project Management and knowledges Service hnuaiah Orientation, Meeting, Briefing & Training chi hrang \um sarih neih a nih tawh thu leh, Baseline Survey neih tawh a nih bakah District chhunga khaw 42-ah Village Level Consultation Meeting neih tawh a nih thu te a sawi a. Heng khaw 42-ah hian Lead Farmer tur thlan vek tawh niin, Farmer Interest Group (FIG) 157 din an nih tawh thu a sawi bawk. Hei bakah hian Jhum Improvement hmalakna in District chhunga Hactare 740-a zau ah Arhar Dal chin tir mek an nih thu leh M. Orange pawh chhungkaw 1167 te hnenah chin tir tura hmalak mek a nih thu a sawi a. Heng loneitute tan hian training chi hrang hrang neih \hin a nih thu a sawi bawk. Heng bakah hian Land Resource, Soil & Water Conservation hmalakna lamah khaw 35-ah Community Conservation Area enfiah tawh niin thawktute tana training chi hrang hrang a remchan dan anga buatsaih chhoh zel a nih thu a sawi bawk.

He Meeting-ah hian AH & Vety Department hnuaia hmalakna tur kumin atana rua-hmanna \henkhat te an enpuiin a pawmpui nghal a, chung zingah chuan Vawk note tihpun nana khaw 4-a Vawkpui pasarih (7) \heuh vulh tura thlanchhuah chhungkaw 10 te chu pawmpui a ni a. Heng chhungkaw 10 te hi Serchhip-ah chhungkaw 7 bakah Kei\um, Bungtlang leh Khaw-lailung-a chhungkaw pakhat \heuh niin an mamawh tur sum leh hmanrua \anpuina zaa 50 chu FOCUS a\angin pek an ni dawn a ni. 

Hetiang bawk hian District chhung khaw panga- Hmawngkawn, Lungkawlh, Khawbel, Leng leh Sailulak-ah te Sial vulh kalpuina tur leh an mamawh hrang hrang te ruahmanna chu pawm a ni bawk a. He ruahmanna hnuaiah hian Hmawngkawn-ah chhungkaw 18 in Sial 105 vulhin Leng-ah hian chhungkaw 15 in Sial 61 an vulh a, Sailulak-ah hian chhungkaw 21 in Sial 127 vulhin Khawbel-ah chhungkaw 9 in Sial 48 an vulh a, Lungkawlh-ah chhungkaw 10 in Sial 28 vulhin heng mite tana Sial In sak sakna tur te, an tui inna tur siam sak te, an tlatna tur ram hung sakte chu hmalakna tur langsar te niin anni pawh hi FOCUS a\angin 50% puihna pek tur an ni dawn a ni.

Nimin-a Meeting-ah hian Line Department hrang hrang- AH & Vety, Horticulture, Land Resource, Soil & Water Conservation leh Agriculture bakah Rural Development Department hotute telin FOCUS hmalak zelna turte pawh an sawiho nghal bawk.

** FOCUS (Fostering Climate Resilient Upland Farming Sysytem) Project atan hian January 25, 2018 khan New Delhi-ah inremsiamna ziahfel a ni a, kum 6 chhung kalpui tur a ni.

** He project hmalakna atan hian cheng vbc. 537.272 ruahman niin, IFAD (International Fund for Agricultural Development) kaltlangin Loan cheng vbc. 53 chu United Nations atanga hmuh niin, sawrkar laipui scheme dangte nena convergence a kalpui thin tum a ni. 

** Tun dinhmunah District 4- Serchhip, Champhai, Kolasib leh Mamit-ah te hmalak niin, khaw 272 a chhungkaw 64500 in an chhawr tangkai thei dawn a ni.

** He project hian lo neitute dinhmun chawikan mai piah lamah awmze nei zawka tlangram loneih dan kalpui hi a tum pawimawh tak a ni.

** FOCUS hi Mizoram leh Nagaland-ah chiah kalpui ala ni.