Bru Camp-a awm te enfiah hna \an leh a ni dawn

Tripura Relief Camp 6-a awm Bru ho Mizorama hruaikir hna \an thuai thei turin tunkar Nilaini a\ang hian Relief Camp a Mizoram mi dik tak an nih leh nih loh enfiah thawh hnihna \an a ni dawn.
Home Secretary, Lalbiakzama hnen a\anga thudawn danin Tripura Relief Camp-a Bru awmte ngaihvena viltu pawl, Joint Monitoring Group (JMG) chu Zirtawpni khan Delhi-ah an \hukhawm a. Hetah hian Bru hruaikir vawi 9-na leh a hnuhnung ber tur hi September-ah \an hman ni se la, October-ah chuan zawhfel vek ni se ti a rel a ni a. A hma a Mizoram mi dik tak finfiaha chhinchhiah tawhte bak naupiang thar leh an lehkha neih dan endik nawn ngai a awm theih avangin enfiah thawh hnihna hi July ni 3 a\anga \anin ni 20-ah zawhfel tura tih a ni a. Hemi hna thawk tur hian Mizoram sawrkar hnathawkte chu Vawiin a\ang hian an inbuatsaih nghal dawn a, Mamit, Lunglei leh Kolasib District a\anga Relief Camp a kal tura ngaih an ni.
Delhi a JMG inkhawmah hian Ministry of Home Affairs hotu liante bakah Mizoram leh Tripura Home Department hotute leh Mizoram Bru Displaced People's Forum (MBDPF) hruaitu pathum an tel a. Mizoram tlawmngai pawh aiawhin Central YMA President bakah Bru NGO aiawh pahnih an tel bawk a ni. Tun dinhmuna Tripura Relief Camp 6-a awmte zinga Mizoram mi dik tak ni a chhinchhiah chin a Bru chhungkaw 4,185 te chu Mamit District-a inbebeltir tum an ni a, chhungkaw 822 te chu Kolasib District-a khaw 10-ah inbenbeltir an ni anga, chhungkaw 371 chu Lunglei District-ah dah an ni thung ang.

Comments

Popular posts from this blog

PAN CARD an tih teh fo hi - Laldinpuia