SAVA in Assembly neiin Serchhip-a Ar man bithliah

Serchhip Ar Vulh Association (SAVA) chuan nimin khan Assembly vawikhatna an nei a, Serchhip DVO, C. Zarzokima chuan khuallian niin a hmanpui a ni.

Serchhip Hmar Veng YMA Hall-a SAVA Assembly hi an President, C. Lalhmunliana chuan kaihruaiin he huna khuallian Serchhip DVO, C. Zarzokima chuan kan nitin eizawnna kawnga Pathian duhdan anga kal a, rintlak nih hi malsawm dawnna kawng a ni, tiin Serchhip-ah Ar vulhtu pawl, SAVA din a ni chu lawmawm a tih thu leh Serchhip leh a chhehvela Ar vulhtute tan hmasawnna kawng dap tura theihtawp chhuah turin a chah a, Department in a tihtheih chin ah theihtawp chhuahpui an huam thu pawh sawiin, Ar 50 aia tam vulh te chu an hnena hriattir turin a chah bawk. Sa chi hrang hrang zingah a ti var chu mihring tana hrisel a nih thu leh Ar pawh mihring tana hrisel a nih thu pawh DVO chuan sawiin, heng te hi mihring tan ei uar a pawimawh thu a sawi bawk.

Nimin-a SAVA Assembly-ah hian Dr. H. Vanlalrawna, Veterinary Officer Serchhip chuan Ar vulh tura hriattur pawimawh hrang hrang, a In sak dan te, a chaw pek dan leh an damloha enkawl dan hrang hrangte he huna kalkhawmte hi a hrilhfiah bawk a. Zawhna leh chhanna hun hman a ni bawk.

Serchhip Ar Vulh Association Assembly hian chawhnu lamah rorelna neiin Ar pum hralhna rate chu a len zawng bithliah awm lovin Kg. 1 Rs. 180/- zel ni tawh se tiin hei hi District thuneitute hnenah thlen nise an ti a. Membership Card siam in, Ar Note leh Ar chaw man tlawm zawka lak theih turin Association in hmalak an rel bawk. Tunhnaia din he Pawl thar ah hian member 162 awm tawhin Serchhip khawpui chhung bakah Kei\um leh Bungtlang-ah te pawh member hi an awm a ni.