MPC nen a rem chinah thawkho turin ZPM a inhawng reng - Lalduhoma

ZPM Leader, Lalduhoma chuan MPC chu tun dinhmun ah an zingah Party angin tel lo mah se an \hian\ha ah an ngaih thu leh a rem chinah thawkho zel turin ZPM hi an la inhawng reng tih a sawi a. ZPM MLA te chu eng Party mah zawm thei an nih loh thu a sawi bawk.

Nimin-a ZPM in Chhung Inkhawm, Aizawl-a ZPM Office-a neih ah ZPM Leader, Lalduhoma hian ZPM in Brig. T. Sailo-a’n a vei em em tih sawiin, Power-a intodelh leh Basic Needs tipuitling turin hma a la zel dawn tih a sawi a. “Pu |hena hming hi a daih kan phal dawn lova, policy a lo duante kha kan Policy laimu a ni reng dawn a ni,” tiin, “MPC unau, kha leh chen kan lo thawhpuite zawng zawng kha, ZPM dintu leh a neitute an nih inhria a, ZPM an zawmna lehkha rawn thehlut sup sup turin kan sawmin kan ngen a ni,” a ti a. “Sawrkar Kalphung Thar, Mipui Sawrkar’ siam turin Pawl hrang 7-ten ZPM kan din a. A tirah chuan, a bul \an nan, mahni pawl \hiat lova thawhhona huang a ni. Hun a lo kal deuh a, mahni Pawl hal rala Party pakhata infin \ul tihna leh duhna a lo lian ta tual tual a, rawtna pawh vawi engemaw zat a lo lut ta a. Chuvangin, kum 2017 tawp lamah daih tawh khan, Party pakhata infin rem kan tih leh tih loh chu pawl tin kan zawt ta a. MPC unauten rem an tih loh avangin kan puitlin ta lo a ni,” a ti.

Independent ang ringawta inthlan hmachhawn chu fel lova an hriat si avangin kawng dang an dap zui zel thu pawh sawiin Lalduhoma chuan, “Keimah ngeiin MPC te hian an Party hming hi ZPM-in thlak se, an Symbol leh Recognition hi chhawm mai ila tih ka rawt a. ECI-ah pawh a rem leh rem loh kan zawtfiah vek a. Mahse MPC unaute chuan an recognition leh symbol hman pawh chu an remti thei ta lova. ZNP ten kan theih thu kan thlen pawh chu min pawmpui thei ta chuang lo a ni,” a ti a. ZPM-a telte hi Party khata infin an remtih leh tih loh hi May, 2019 ralhmaa thehlut vek tura hriattir thar leh vek an nih thu leh, pawl dang zawng chuan May thla chhungin rem an tih thu an thehluh vek laiin MPC erawh chuan thumum an nei thei ta lo tih a sawi a. June thla ah hriattir nawn leh niin an chhanna an nghah laiin Press Conference kovin ZPM-a tel an tum loh thu an puan hnan thu leh an hruaitu ten hmaichhana an kawm hnuah pawh ZPM-a tel an tum loh thu chu chiang taka hrilh a ni leh ta tih a sawi bawk.

ZPM MLA te Party danga pakai mai tur anga thuthang awm chu thu diklo, sawrkar tura anmahni ngaituten in huphurh vanga an phuahchawp a nih thu sawiin Lalduhoma chuan, “Anti-Defection Act kan tih mai, 10th Schedule to the Constitution of India hi Parliament-a pass tute zingah ka tel ve a. He Dan hmanga MP nihna hlihsak hmasak ber, Pension pawh la thei lova an siam kha ka ni bawk,” tiin “He Dan-in a tum ber chu min thlang tlingtute uire san a, Party danga pakai tur venna a ni. ZPM MLA te hi ban kan nih theih dawn avangin eng party mah zawm thei kan ni lo. Chuvangin Pu Duha Congress President-ah a awm dawn tih velah hian tumah lo buai suh u,” tiin “ZPM MLA te tan hian ZPM chauh hi himna awmchhun a ni,” a ti bawk.

Lalduhoma chuan ZPM MLA te chuan thlantlin an nih hmain siamtu Pathian leh mipuite hnenah ZPM-a rinawm taka awm turin thu an tiam thu leh Legislative Assembly-ah ZPM Legislature Party anga ziak luh leh pawm  an ni tih sawiin, ZPM mipuite an phatsan a thiang lo tih a sawi bawk.

Ramri chungchang ah Lalmuanpuia Punte, PAC Member pawhin thu sawiin, “Mizoram sawrkar Cabinet Meeting-in Assam leh Mizoram ramri 1875 an pawm a nih chuan Mizoram Map diklo kan hman mek hi sawrkar office-a intar mek hi an pawtthla vek tur a ni,” tiin Mizoram sawrkar Map chu a rang thei ang bera siam\hat an phut thu a sawi bawk.