Tripura Relief Camp-ah Mizoram mi endik hna thawh hnihna kalpui chhunzawm zel a ni

Tripura Relief Bamp 6-a awm Bru te Mizorama hruaikir hna \an a nih hma a Mizoram mi dik takte endik hna thawh hnihna chu tun thla ni 2 a\ang khan \an a ni a, tunkar Inrinni a zofel hman tura ruahman a nih laiin an zo hman dawn nge dawn lo tih a la hriat loh.
Home Secretary, Lalbiakzama hnen a\anga thudawn danin Tripura Relief Camp-a Bru awmte a hmuna Mizoram mi endik thawh hnihna hi tluang taka kalpui zel a ni a. Mizoram mi endik an nih bakah hian kumin chawhnu lama Mizorama hruai kir hna thawhna tura lokir duhte chhinchhiah hna thawh nghal a ni bawk a. Mizoram mi dik tak endik leh lokir duh tur endik hna hi a pawimawh thu sawiin, tunah hian Bru lakletna senso atan hian cheng vbc. 60 bawr vel hman ban a awm a. A lokir duh tur zat a zirin sawrkar laipui-a sum dil belh tur a nih thu a sawi a. Hruaikir hna thawhna senso bakah kum 2 chhunga a thlawna eitur an dawn tur senso leh chhungkaw tin thla tina Rs. 5,000/- pek turte nena chhut fel vek a ngai a ni, a ti.
Home Secretary, Lalbiakzama chuan Bru laklet hna thawh \an hun turah hian sawrkar laipui lam an hmanhmawh hle niin a sawi a. Mahse, Mizoram Fur ruahtui tlak dan a zirin a hun tur hi bituk a harsat thu an sawi chhuak niin a sawi a. Hei bakah hian kawng hrang hranga inbuatsaihna tur a la awm niin a sawi. Tun dinhmuna Tripura Relief Camp paruk-a awmte zinga Mizoram mi diktak ni a chhinchhiah china Bru chhungkaw 4,185 te chu Mamit District-a inbebeltir tum an ni a, chhungkaw 822 te chu Kolasib District-a khaw 10-ah inbenbeltir an ni anga chhungkaw 371 chu Lunglei District-ah an kal ang. Mizoram sawrkar leh NGO Coordination Committee te Lok Sabha inthlan hmaa an inrem dan ang chuan kumin chhung ngei hian Bru te hi laklet an ni tur a ni a, heta lokir duh lote chu Tripura-ah an awm hlen ang a, lokir duh lo Mizoram Electoral Roll a hming chuangte pawh an hming paih a ni ang. 
Sawrkar laipui Ministry of Home Affairs duhdan chuan September thla ah Bru hruaikir hna thawh zawhfel vek a, October ni 1 a\ang chuan Relief Camp 6-te hi khar nghal tur a ni a. Chutiang chu an duhdan a nih thu hi Mizoram Bru Displaced People's Forum (MBDPF) hruaitute hnenah pawh an hriattir tawh a ni.

Comments

Popular posts from this blog

PAN CARD an tih teh fo hi - Laldinpuia