MPCC in Aizawl-ah ramri zirhona an nei

Mizoram Pradesh Congress Committee (MPCC) chuan nimin khan Aizawl-a Congress Bhavan-ah Friday Political Session neiin Mizoram ramri zirhona an nei.
Mizoram ramri zirhonaah hian MPCC President, Lal Thanhawla chuan MNF leh India sawrkar inremna ziah a nih dawn khan ‘ramri chungchang chinfelna hun remchang a ni e’ tia ramri chingfel hmasa phawt tura MNF hotute an ngenna chuan ngaihpawimawh a hlawh lo tih sawiin, “Remna ziah an hmanhmawh em avangin ramri chingfel hmasa lovin remna ziah a ni ta a, a pawi zo ta a ni,” a ti.
He hunah hian Lok Sabha MP hlui, CL. Ruala leh MPCC Legal Department-a Chairman, RC. Thanga te chu Resource Person-ah hman niin Mizoram Chief Minister hmasa ber, Ch. Chhunga’n January 2, 1974-a India ram Prime Minister hnena Memorandum a thehluh-a a tarlan, “Lushai Territory leh Cachar inkar a ramri Demarcated leh Notified awmchhun chu Inner Line 1875 hi a ni a, chuvang chuan Inner Line Reserved Forest Area hi Mizoram chhungah a awm vek tur a ni,” a tih chu Mizoram leh Assam inrina atana Mizoram lamin kan pawm tlan a ni tih tarlan niin July 3, 1987-a Dispur, Assam-a Chief Secretary-te ve ve inbiaknaah pawh hei tho hi Mizoram \anchhan a nih thu leh Mizoram sawrkar Cabinet Meeting, May 27, 1988-ah pawh hei tho hi \anchhan a nih thu tarlan a ni bawk.
Hei bakah hian Cachar leh Mizoram inrina hi Inner Line Regulation, August 1875-ah chiang taka tarlan a nih thu leh chhinchhiahna ramri lung pawh 46 lai phun a nih thu te, hei hi Assam Government Note on the Lushai, 1973-1889 para 86-ah pawh chiang taka tarlan a nih thu leh hetiang a nih lai hian India sawrkar leh MNF inremna, Memorandum of Settlement Article 4.3 (1)-ah chuan North Eastern Areas (Reorganisation) Act, 1971 chu Mizoram leh Assam leh Mizoram ramri a nih thu tarlan a nih tak thu leh hei hian tun thlengin Mizoram \anhmun hi a ti phet ta tlat tih he hunah hian tarlan a ni.
Heng bakah hian Mizoram leh Assam ramri buai chungchangah hian Congress kaihhruai sawrkar chuan nasa takin hma a lo lak tawh thu pawh he hunah hian tarlan niin kum 1993, Congress sawrkar lai khan DC Level-ah inbiakna neih a lo nih tawh thu leh Chief Secretary Level-a inbiakna neih chhunzawm leh niin Chief Minister Level-a inbiakna awm leh tura ruahman a ni a. Amaherawhchu, khatihlaia Mizoram Chief Minister, Lal Thanhawla’n Delhi a inhmuh a rawt laiin, Assam Chief Minister Hiteswar Saikia chuan Gauhati-a inhmuh a rawt ve thung a, an thu a inhmu ta lo a, inbiakna a kaltluan tak loh thu leh hemi hnu hian ramri chingfel tura High Level-a inbiakna mumal a awm ta lo tih tarlan a ni bawk.

Comments

Chhiar Hlawhte

Youth Icon Top-50 thlang

PAN CARD an tih teh fo hi - Laldinpuia