Tourism Department-in cheng nuai 250 chuang hmu

Kum 2017-18 chhung khan Tourism Department-in cheng nuai 250.10 a thawk chhuak tih Tourism Minister, Robert Romawia Royte-in a sawi.

Assembly Budget Session neih zawh takah MNF member, Dr. Vanlal\anpuia zawhna ziaka a chhanaah Tourism Minister, Robert Romawia Royte chuan, Mizorama Tourist Industry ti hmasawn turin Sawrkar chuan Mizoram Tourism Policy, 2014 a siam a, hei hi hman mek a ni, a ti. Tourism Minister chuan Mizoram Tourism Policy hmang hian khualzin hip turin Eco-Tourism, Rural Tourism, Adventure Tourism, Cultural and Heritage, Religious leh Natural Based Tourism-ah te nasa taka hmalak tum a nih bakah tunah hian Tourism Master Plan siam tura hmalak mek a ni a, Mizoram-ah ngei Hotel Management zirna changtlung tak a awm theih nan hmalak a ni, a ti.

Heng bakah hian khualzin tam zawkin Mizoram an tlawh theih nana hmalakna zingah Hotel leh Restaurant-te chu Tourism Department hnuaia awm tira, felfai zawk leh thianghlim zawka dan hmanga enkawl tura hmalak mek a ni tih Robert Romawia Royte chuan sawiin, Tourism Industry hrang hranga thawktu, Tourism Service Provider-te chu Department hnuaia rinluh a, changtlung leh felfai zawka enkawl tum a nih thu a sawi.

Mizoram hmun \henkhata Tourist Lodge mimal kuta hlan chu Tourism Department chuan hlawk hle a hriat thu pawh sawiin Tourism Minister chuan, hei hi chhunzawm zel tlak ah ngaih a ni, a ti a. Mizoram hmun hrang hranga Mimal-in an enkawl tak Tourist Lodge a\ang hian thla tin a luah man dawn \hin a ni tih a sawi a, heta \ang hian sawrkar chuan hlawkna a lo tel \hin tih Pu Robert Romawia Royte chuan a sawi bawk.