ENGTIN NGE NI ZEL DAWN LE...

ENGTIN NGE NI ZEL DAWN LE...

- Papuia

Kumin Fur ruahtui karkhat zet zawt chhum lo chat lova an tlak leh meuh chuan, chhiatna avanga nunna hlu tak chan, In leh lo chan, leimin, kawngchhia, tuilian ramtin hmuntin ah a thleng leh ta chuah chuah mai. Serchhip pawh a tuar nasa ber pawl kan niin a hriat a, “a pawi...” tih ngawt loh chu sawi tur a vang hle mai, chhiat tawk chhungte Pathian in awmpui mawlh teh se. 
Kan chenna leilung hi a mi cheng te hian a dinhmun leh a nihphung kan hriatchian a ngaiin a \ul hle, mithiam leh hre zawkte thu leh hla ngaipawimawh turin kan leilung awmdan hi kan hriatchian ve a \ul hle a, hei hian kawng hrang hrangin fimkhurna tur kawngah min pui ngei ang. Kan hriatlohna avang hian, hlauhawm ah ding in, kan fimkhur lo fo \hin. Chhiatna lo thleng tur tamtak hi hriat lawk leh lo inrinlawk theih dan tur a awm ve a, hemi kawnga hmala tur hian mipui Sawrkar leh mimal tin hian tihtur kan nei \heuh a ni.
Tun dinhmunah kan Insak dan enpui a min kawhhmuh tu Aizawla AMC angte kan neihloh avangin VC leh Department lam enkawltu ten emaw Committee din a, Area hrang hrangte, a leilung leh hmunhma a zir zelin a tlangpui tal a In sak dan tur te, In sak theihna tur chin te duang in, mihring chenna tur sak phalna leh phallohna chin te emaw ruahman in, In sa tur te hriatpuia enpui \hin nise. Chutiang bakah chhiatrupna thleng thei kawng hrang hrang te ngaihtuah ran a thuneihna sang zawk nei leh chak taka hmala tur, a \ul chuan tuna ruahmanna lo awm tawh sa emaw, Building leh thildang development leh construction work \halo leh mihring tana hlauhawm deuh te \hiat thei tur Committee sang neih theih a chakawm hle mai. He Committee hian Town Planning thlengin hma la thei nghe nghe se.
Leilung chet dan hi a zirmi leh thiamna neite tan lo chuan hriat sen leh hriat theih pawh a nilo a, hetiang kawnga kan hriatna tizau tur atan mithiam te sawi kan hriat tam a \ul hle a, Disaster Awareness Campaign te pawh neih fo \hin ni mahse, a aia uar a kan la neih hi a ngai a, tam zawk leh effective zawk a inhrilhhriat dan te pawh Department leh Media mite pawh hian kan ngaihtuah tlan a \ul hle, mipui hi kan deldul \hin avang hian Disaster Management Plan, Mock Drill te hi sawi/neih tam lutuk a awm theilo.
Heng kan han sawi tak te hi nei theiin lo puitling vek pawh ni sela, a tak taka hlawhtlinna chu mipuite kan ni, mipuite hian dan kan pawisak a, kan zahthiam a \ul hle a chutiang a nih loh chuan Democracy ramah hian thil hi a kal fel theilo a, a nih tur ang a ni phak lo fo \hin a ni tih hi sawrkar hmalakna hrang hrang thlir hian a lang chiang hle. Mipui hian thil ho te leh \ul manglo a kan hriat thleng hian danin a phut chuan kan zawm peih a ngai a ni.
Mizoram chu khua, Veng feeling nei tak kan nih avang hian VC leh tlawmngai pawl a bik takin Branch YMA te hi eng kawng ah pawh an pawimawh reng a, kan Veng leh area-ah hian mawhphurhna nasa tak an nei a ni. District leh khawpum huapin thil tih har deuh mahse, VC leh YMA te kaihhruaina hian Khawtin leh Veng tin in kan mamawh em em, kan Vengchhunga tui-hawk leh tuichhe paih/luan chhuah tir dan tur tal hi plan mumal leh fel takin duan theih nise, hei hi a \ul in kan mamawh hle a ni. In tinin kan tuidawn, dithlifarfem a\anga tui kan paih te hi kan kawm-thlang ah duh duhna hmun a chhuah ngawt lovin, mumal taka duan kan drainage system chu hmang vek in, kawmthlang/kawmchhak min tenau kan neih fo tam tak hi chu kan pumpelh thei ngei ang. VC area tinah hian tuna MGNREGS kan thawh dan ang te hian hma lak theih dan a awm thei mial lo maw? Vawikhat ah puitlin theilo mah ila, kan area a thler tin leh veng hrang hrang tan a tah-tawlin kum 2/3 chhung pawn han siam thei ila kan va sawtpui dawn em.
Kan hriat angin Serchhip hian kumtin-in Fur-ah chuan khel lovin khawilai hmun ah emaw buaina lian deuh leh a tenau deuh hi kan tawk ziah a, tun ang reng a nih chuan kan la tawk zel dawn ni pawh in a lang. Ruahmanna felfai deuh leh hmalakna chak tak a awm loh chuan, a aia nasa zawk chhiatna hi engtik ah emaw chuan kan la tawk ngei ang, Fur khat him hi a tawk hauh lo, kum kum 4,5, kum 10 dan ah te pawh, a him emaw kan tih hi a lo la him loh zia chu Serchhip hmun tam tak ah hian a lang reng mai. A langsar deuh,Tuikhuah Veng kawng tlahniam kumtin te, Fur ruahtui tlak apianga Auditorium chhehvel a mi te thinthi a mu lo kumtin ngawt mai te hi chu ngaihtuah mai pawh nilo in hmalak a hun tawh hle a ni. Heti kumtin ringawt tur chu kan ni lo a sin! Kha chen Chief Minister Bial kan ni a, Chief Minister Bial pawh lo nilo tehreng i la, khawtlang hruaitu mi chak tak tak engemaw zat kan nei a, kan kut zala tihngaihna kan hriat loh pawh in mithiam rawn tur tam tak kan nei ve tawh a lawm le, indem a in kawk ngawt lo hian hmathlir thar nen hmathar lak a ngai a ni. I ngaihtuah tlang teh ang u.

Comments

Popular posts from this blog

PAN CARD an tih teh fo hi - Laldinpuia