I&PR Minsiter hovin Serchhip Heritage Day hman a ni

Serchhip Heritage Society (SEHSO) buatsaihin nimin khan Ser-chhip-ah Serchhip Heritage Day hman a ni a, I&PR Minister, Lalruatkima chuan khuallian nia hmanpuiin bialtu MLA, Lalduhoma chuan khual zahawm niin a hmanpui bawk.
Serchhip P&E Veng YMA Hall-a Serchhip Heritage Day hmanna ah hian I&PR Minister chuan Serchhip Heritage Society leh Serchhip Vengchung Welfare Committee, Aizawl \angkawpin Serchhip chanchin ziahna lehkhabu an buatsaih 'Serchhip' tih chu tlangzarhin Mizo history kan hriat dan leh kan pawm danah kawng dik zawk min kawhmuhtu tur lehkhabu \ha tak anih a beisei thu a sawi a. History chu ziah nawn a lo ni fo tawh \hin tih sawiin, a ziaktuten awn lam neiin an duh lam an hawi fo a, he lehkhabu erawh hi chuan behchhan \ha tak neiin lehkhabu changtlung tak, midang pawhin hnial tum mahse dingchang tlat thei tur history \ha tak a tarlang nia a hriat thu a sawi a. Mizo history chu Mary Winchester, Zoluti avangin nasa takin a danglam tih pawh sawiin, Zoluti rawn luhna ram neitu Serchhip leh a chhevel a\angin History-ah hmasawnna nasa tak kan nei ani tih a ti lang a ni, a ti.
I&PR Minister chuan tunlaiah mahni hnam thil ngaihsan lohna in min chiah nasa hle tih pawh sawiin, “Kan \awng a dal tial tial a, kan nau awihna hlate thlengin kan thlak danglam mek a ni a. Kan hnam ziate hlut thar leh turin \hangthar ten mawhphurhna pawimawh tak kan nei a ni tih kan hriat ka duh a. Lehkhabu ziah te, chhiar te uar deuh deuh ila, kan \awng a boral loh nan ziak mite ngaihlu thiam ila, an lehkhabu ziahte pawh i chhiar tam ang u,” tiin he huna kalkhawmte chu a chah bawk.
Serchhip Joint VC Chairman, Zohmangaiha Ralte kaihhruai he hunah hian Khualzahawm, Serchhip bialtu MLA, Lalduhoma pawhin Kawlri tlang leh Entlang chu Heritage Centre lian tak atana buatsaih tum a nih thu sawiin, cheng vbc. 15 man vel Project buaipui mek anih thu a sawi a, Mizoram University-a mithiam 11 ten he project tur hi an buaipui mek tih a sawi bawk. He hunah hian Serchhip Heritage Society (SEHSO) President, Lalrin\huama Kawlni pawhin Serchhip Heritage Society (SEHSO) dinchhuah a nih dan sawiin, Serchhip-a pi leh pute hmun hlui pawimawh awm te a riral mai loh nan a, \hangtharte hmuh theih tura vawnhim zel an tum thu a sawi bawk.
Nimin a tlangzarh tak 'Serchhip' tih lehkhabu-ah hian Serchhip-ah Sailo lal ropui Lallula a lo chen tawh thu te, chhim leh hmar indo vanga ro an phum rukna puk chanchin te, Zoluti mantu chu Pasaltha Chawma a nih thu leh a enkawl zo lova a hriat avanga lal Bengkhuaia hnena a hlan tak thu te bakah Serchhip leh a chhehvel chanchin hlui ngaihnawm tak tak engemaw zat a ziak a ni.

Comments

Popular posts from this blog

PAN CARD an tih teh fo hi - Laldinpuia