Zirna, hmasawnna leh hnam thilah Mizo mipuite tana \ha ber tur ang zelin sawrkar a kal dawn

I&PR Minister, Lalruatkima chuan zirna, hmasawnna leh hnam thilah Chief Minister, Zoramthanga kaihhruai sawrkar chu Mizo mipuite tana \ha ber tur ang zelin a kal dawn tih a sawi.

Nimin zing-a Mizoram sawrkar-a Minister pathum (3) ten MZP General Hqrs. hruaitute Deputy Speaker Office Chamber, Assembly Annexe-a an kawmna ah he thu hi sawiin I&PR Minister chuan nimin zing-a Council of Minister Meeting-ah hemi chungchang hi ngaihtuah a nih thu sawiin, The Mizoram (Selection of Candidates for Higher Technical Courses), Rules, 2016 chungchang pawh Council of Minister Meeting-ah ngun taka ngaihtuah a nih thu leh tun dinhmuna an thlen chin te a sawi a. Hun a tep ter tawh avang leh zirlaite an khawtlai lohna tur Council of Minister chuan a ngaihtuah tih sawiin, he Rules hnuaia Mizoram Quota - Category-I a dil thei te, 'Indigenous People' tiha inziak chu Council of Minister \hukhawm chuan 'Zo Ethnic' bak Mizoram-ah 'Indigenous People' an awm loh avangin Zo Ethnic te pual atan a dah tih a sawi a. Ramri buai chinfel kawnga hmalakna kal chho mekah pawh Mizo mipuiten kan pawm tlan, Bengal Eastern Frontier Regulations, 1875 chu \anchhan atana hman tur leh sawrkar dinna a ni tiin thutlukna a siam thu a sawi a. July 2-a Durtlang-a Basic Service to Urban Poor (BSUP) hnuaia Insak chim chhuichianna pawh Aizawl Bawrhsap kaihruaiin Magisterial Inquiry dina chhui chian tura tih a nih thu a sawi bawk.

He hunah hian School Education Minister, Lalchhandama Ralte pawhin Education Department hnuaia hnathawk lak tur chungchang sawichhuakin, hnaruak hnawhkhah tur hmuna awm thei tur te chauh, induhsakna tel miah lovin lak a ni dawn tih a sawi a. School Education hnuaia hna lakte chu Right to Information Act hmang pawha chhuichian dawl a ni dawn tih a sawi a. Durtlang-a BSUP In a\anga Edenthar leh Rangvamual-a sawnchhuah mek chhungkaw zingah zirlai engmawzat an awm chu pawi a tih thu sawiin, heng zirlaite hian School Admission-ah harsatna an tawh loh nan sawrkarin ruahmanna a siam thu leh MZP hruaitute pawh heng zirlaite School insawnah harsatna an tawh loh nan enchianpui turin a sawm nghal a. Law & Judicial Minister, TJ. Lalnuntluanga chuan hmasawnna leh hnam thila hmalakna ah fimkhur taka kal a \ul thu te, sawrkar anga thil tih ngai te leh mipuiten sawrkar an thlawp tlata, \anrual a pawimawh thu a sawi bawk.

Nimin zinga Minister pathum te leh MZP inkawmnaah hian MZP President, L. Ramdinliana leh Vice Presiedent, B. Vanlaltana te pawhin thu sawiin Council of Minister thutlukna pawimawh tak tak avanga an lawmthu te an sawi a. Boruak \ha tak hnuaiah inpawhtlang takin sawihona neih niin Sawrkar anga tih theih chin te pawh tlang taka sawi a ni bawk.