Mizo thuam inbel, siam chhuah leh humhalh chungchang YMA leh ZOHANDCO aiawh ten sawiho

Mizo thuam inbel, siam chhuah leh humhalh chungchangah nimin khan Central YMA aiawh leh ZOHANDCO-a thawk te chu ZOHANDCO Chairman, C. Lalrammawia hovin a Office-ah an inkawm.

He inkawmna ah hian ZOHANDCO Chairman chuan Mizo thuam humhalha chawinung zel turin Central YMA nen an thawhho a \ul takzet tih sawiin, YMA chuan ram leh hnam humhalh kawngah hna \angkai an lo thawh tawh thu a sawi a, Mizo thuam chungchang ah pawh an \anho chuan nasa taka hma an sawn ngei a beisei thu a sawi bawk. ZOHANDCO chu Dec. 20, 1988-ah Company Rules hnuaiah Dan ang thlapa din a nih thu sawiin, Mizo hnam ziarang siamchhuahna a nih avangin a \hangduang hle a, Manipur lam a\anga Mizo puantah chi hrang hrang rawn zuar \hin pawh dang betin, Mizoram-a puantah mawi tak takte chu Manipur-ah an zuar thei ta zawk hial tih a sawi. ZOHANDCO Chairman chuan kum 30 dawn a ral hnuah sum lama harsatna nasa tak a tawh avang leh Corporation mahni inchawm zo lo anga a lan avangin Dec. 18, 2015 khan Cabinet Meeting chuan tihtawp (Close Down) turin a rel tih a sawi a. ZOHANDCO chu titawp mai tura ngaih a nih hnuah sawrkar inthlakin Mizo Hnam thil leh ziarang siamchhuahna chu tawptir phal lovin Feb. 12, 2019-ah Chairman ruatin a kaitho leh tih a sawi a. ZOHANDCO chu beiseina thar, rilru thar, tumna thar leh ngaihtuahna thar nen hmasawn tur zawngin a kal \an ta mek tih a sawi bawk.

ZOHANDCO \hanna leh hmasawnna tur chu Mizo mipuiah a innghat tlat tih pawh sawiin ZOHANDCO Chairman chuan, a hmanrua (Materials) leh a siamchhuah (Finish Products) chu Mizo thuam inbel leh Mizo ziarang (Culture & Tradition) lanna a nih avangin Mizo mipui kan tam tawlh tawlh angin kan hmang tam tawlh tawlh bawk ang, a ti a. “Kan Hnam thuam inbel hi Rorelna leh Committee-na ah, Office leh hnathawhna-ah, Puipunna leh Kut ni-ah te kan hak tam deuh deuh hian hausa leh rethei a khairual a, ram dang a\anga thawmhnaw manto tak tak a dang bet tial tial thei a ni. Biak In-te Fashion Show ang maia sawi theih tawhah te hian ha vek thei ila kan rualtlang anga, Mi hla-te an awm tlem sawt ang a, kan biak Pathian pawh a lawm zawk ngei ang,” a ti bawk.

He hunah hian Central YMA Vice President, R. Lalngheta pawhin YMA in kan Hnam incheina an vei thu sawiin, a theih anga vawngnung zel turin hma an la \hin tih a sawi a. Central YMA chuan Thangchhuahkawr leh Tawlhlohpuan bik hi chu, eng anga hotu lian leh lal pawh nise, lo bahtir leh haktir ve ngawt chu an ui em em \hin tih a sawi bawk. Central YMA Finance Secretary, Fabian Lalfakawma pawhin Hnam Tradition a bo chuan hnam chu a bo a ni mai tih sawiin, “Indigenous-te hian kan Traditional Dress hi kan mawipui ber a ni. Kan CM hi fakawm ka ti a, ram leh hnam humhalh-ah hian a tui ve hle niin ka hria a. Chu mai piah lamah ZOHANDCO a lo dinthar leh zelte hi lawmawm ka ti takzet a ni,” a ti bawk.