Health Minister in Aizawl Civil Hospital a tlawh

Health Minister, Dr. R. Lalthangliana chuan nimin zing khan Aizawl Civil Hospital tlawhin Department hrang hrang awmna hmun leh building hrang hrang bakah hmanrua leh khawl chi hrang hrang te enin thawktute nen inkawmna an nei bawk.
Aizawl Civil Hospital a tlawhna ah hian Health Minister chuan Aizawl Civil Hospital chu kum 1894 a din anih thu sawiin, ram leh hnam rohlu a tling pha a nih thu a sawi a, hei vang hian hlamchhiah theih a nih loh thu leh tihchangtlun dan tur ngaihtuah a ngaih thu a sawi a. Doctor leh Nurse ten damdawi In bulhnaia chenna tur, Residential Quarters an neilo chu pawi a tih thu sawiin, damlo Emergency-a buaipui ngai an awmin hei hian harsatna lian tak a thlen \hin tih a sawi a. Doctor kan ngah rualin Department \henkhat pawimawh tak tak vil tur Specialist Doctor kan neilo \hin chuan rualawh a ti na tih a sawi a, hetiang zir tur hian rampawn lama zirna sang zawk pan turin kan in tirhchhuah tam a ngai a, Doctor te pawhin heihi ngaihven tura a duh thu a sawi bawk.
Health Minister hian Cardiology Ward a tlawhnaah Cardiac Catheterization Laboratory (CathLab) Earthing siam\hat ngaih avanga khawl hman theihloha awm chu amah \awiawmtu P&E Department Engineer te hnenah a rang thei ang bera siam\hat sak turin a hrilh a, Oxygen Plant Ventilation siambelh ngai pawh amah \awiawmtu PWD Engineer te hnenah Civil Hospital hotute nen lo enzui a a rang thei ang bera siam turin a chah bawk.
Health Minister hian Staff indaihlohna avanga harsatna an tawh te a hmunah enin, abik takin Nurse, Technician leh IV-Grade indaihlohna nasa chu a rang thei ang bera chinfel anih tur thu a sawi a. Staff indaihlohna avanga Gaeriatric Ward ( kum Upate enkawlna) hawn theih ala nilo pawh chu tihdan kawng dap anih tur thu a sawi a. Hospital building hlui, upa tawh tak tak te pawh major repair ngai tak tak an nih thu sawiin, a theih ang ang a thawm\hat anih theihnan hmalak a tum thu a sawi a. Building sak thar la luah loh te pawh ruahmanna fel tak nena luah luh dan ngaihtuah a \ul thu sawiin, Civil Hospital Department hrang hrang awmna siam rem leh siksawi dan tur te a en bawk.
Aizawl Civil Hospital-ah hian tun dinhmunah Khum 275 a awm mek a, Clinical Department 15, Super Speciality Department 1, Para-Clinical Department 4 leh Support Service hrang hrang te nen Hospital hi a kal mek a ni. Post Graduate (DBN) zirna subject Panga (5) a awm a, tunah hian zirlai 27 (mipa 19, hmeichhia 8) an awm mek a, MCI leh Indian Nursing Council te pawmpui Training Institute a ni a, ICMR, Department of Biotechnology, MZU, RIPANS te nen thawkho in Medical Research engemaw zah kalpui mek a ni bawk.

Comments

Popular posts from this blog

PAN CARD an tih teh fo hi - Laldinpuia