Serchhip-a MHIP Branch 19 ten MHIP Day an lawmna I&PR Minister in a hmanpui

Inrinni kalta, July 6, 2019 hi Mizoram-a Hmeichhiate insuihkhawmna Pawl lian ber, MHIP dinchampha vawi 45-na a ni a. Mizoram hmun hrang hrangah MHIP Day hi lawm niin Serchhip khawpui chhunga MHIP Branch 19 te chuan a huho a hmangin I&PR Minister, Lalruatkima chuan khuallian niin a hmanpui.

MHIP Sub-Hqrs. Serchhip bultuma Serchhip khawchhunga MHIP Branch 19 ten a huhoa MHIP Day lawmna Ramlai Community Hall-a neih hi MHIP Sub-Hqrs. Serchhip President, Sanghmingliani chuan kaihruaiin he hun khuallian nia hmanpuitu I&PR Minister, Lalruatkima chuan Mizo ten lungthu anga pawimawh pawl pathum, YMA, MHIP leh MUP te kan neih thu sawiin, MHIP chu kum 1974-a ding a nih thu leh hmeichhia te humhalh tura thawktu pawl pawimawh leh midangte \anpuitu pawl pawimawh a nih thu a sawi a. Nu te chu chhungkua ah an pawimawh thu sawiin, chhungkaw enkawltu pawimawh ber an ni tih a sawi a. Hei vang hian kan ram siam\ha turin chhungkua ah bul kan \an \hat a \ul thu leh chuta tan chuan chhungkaw awptu ber Nu te chu an pawimawh thu a sawi a. Kan ramin natna kan tawk mek tih sawiin, kan ngaihhlut zawng kan thlak thuai loh chuan kan ram leh hnam a dam zo dawnlo tih pawh sawiin, chhungkaw tin-a Nu te chuan kan ngaihhlut tur dik min zirtir thar a \ul thu a sawi bawk.

He hunah hian khual zahawm Adviser to Chief Minister, C. Lalramzauva pawhin tunhma ngaihtuah chuan Mizo Hmeichhia ten hma an sawn nasat thu leh kawng tam takah chuan Mipa te aia chungnung zawk an nih tawh thu a sawi a. Eizawnna kawngah pawh Hmeichhia te chu kawng tam takah chhungkaw khaidingtu an nih tawh zawk thu sawiin, kan Hmeichhia te nasa taka an \han ang hian Mipa te hi \hang ve ila chuan tun aia nasa a kan Hnam in hma a sawn tur thu a sawi a. Mizo Hmeichhia ten kawppui an thlan fimkhur a \ul thu pawh sawiin, Mizo ngei kawppui a nei tur leh Mizo fa ngei hring turin a chah bawk.

Serchhip-a MHIP Day lawmna ah hian MHIP Sub-Hqrs. Secretary, Lalhmunsangi hnen a\angin Report ngaihthlak a nih bakah kum kalta chhunga MHIP Member boral mi 41 te sunna hun hman a ni a, MHIP thuthlung sawirualna hun hmangin item chi hrang hrang entir a ni bawk a, he hunah hian Serchhip District SP Office chuan MHIP te hnenah hian MHIP Day lawmpuina leh duhsakna chibai bukin MHIP Day lawmpuina thuziak an hlan bawk a ni. Chawhnu lamah MHIP Sub-Hqrs. Vice President, Lianthangi kaihhruaia hun hmang lehin naupangte dikna leh chanvo humhalhna Dan zirhona neih a ni bawk.