Serchhip-ah New Education Policy-2019 sawihona leh inrawnkhawmna neih a ni

Sawrkar laipui in India rama zirna kalphung thar tura a duan, ‘New Education Policy-2019’ chungchang sawihona leh inrawnkhawmna, ‘District Level Consultation Meeting on Draft New Education Policy 2019’ chu nimin khan DIET Serchhip-ah neih a ni.
Serchhip DIET Multipurpose Hall-a ‘District Level Consultation Meeting on Draft New Education Policy 2019’ hi Serchhip DIET Principal, Lalrammawia chuan kaihruaiin kum 2015 vel a\ang khan India rama zirna kalphung thar siamna tur, Education Policy thar hi ngaihtuah \an a nih tawh thu leh June, 2017-ah a duangtu tur Committee siamin December, 2017-ah Report pe tura tih ni mah se \um 5 lai Report pek hun tur hi pawhsei a nih hnuah December 15, 2018 khan Report hi an thehluh tak thu a sawi a. He ruahmanna thar zirhona hi District hrang hrangah neih tura ruahman a nih angin Serchhip-ah pawh buatsaih a nih thu leh zirna kaihhnawih Department hrang hrangte, Zirna In-a hotute te, Zirlai Pawl hruaitute leh mithiam te nen sawihona hi neiin chuta an thil sawilan te chu mumal taka chhinchhiahin State Level-a sawihona ah pharh leh tur a nih thu leh State Level-a sawihona-a tarlan te chu National Level-ah la pharh leh tur a nih thu a sawi bawk.
Nimin a he sawihona hun hi Serchhip DEO, Lawmawma pawhin hmanpuiin he ruahmanna thar hmang hian kan Education System chu thlak danglam a nih dawn thu leh School kal dan tur ruahmanna thar te pawh siam mek a nih thu a sawi a. Pawl 2 hnuailam chu Foundation Stage-ah dahin pawl 3 a\anga 5 chu Primary School-ah dahin pawl 6-8 chu Middle School-ah dah bakah pawl 10 a\anga 12 thleng chu Semester System-a dah rawtna te pawh a awm thu a sawi a. Sawrkar ruahmanna thar ah thil tam tak tih danglam a nih dawn avang leh Hnam leh Sakhua leh Society thlenga khawih danglam thei a ni dawn avang a uluk leh fimkhur taka zir turin he huna tel te chu a chah a. Sap\awng kan ngaihsan avangin kan Eduction kalphung pawh a her dik tawhloh thu pawh a sawi bawk.
New Education Policy 2019 hi hlawm li-ah \hen niin nimin a sawihona leh inrawnkhawmna hunah hian Vanlalchhana, SDEO Serchhip; David Rosangliana, Asst Proffessional,Govt. Serchhip College, R. Lalrinawma, Lecturer DIET Serchhip leh Lalrammawia, Principal, DIET ten heng hlawm hrang hrangte hi sawizauna an nei a, hemi hnu hian sawihona neih zui nghal a ni bawk.

Comments

Popular posts from this blog

PAN CARD an tih teh fo hi - Laldinpuia