Tunhnaia ruahsur nasa avangin In chhia 5 leh luahzui tlakloh a \hiah ngai 2 awm

Tunhnaia Serchhip District chhunga ruahsur nasa avang khan Serchhip District-ah In luahlai leh sak mek chhe vek 5 awmin In dinglai \hiah ngai pahnih (2) a awm bawk.

Serchhip DC Office a\anga thu kan dawn danin kar kalta lamah Mizoram chhung hmun hrang hranga ruah tam tham tak surah khan Serchhip District chhungah leimin hmun hrang hrangah awmin In chhia leh mahni In chhuahsan pawh an awm nual a. Serchhip DC Office chuan VC hrang hrangte hnenah chhiatna thlen dan report-na tur Form siamsa thawnchhuakin inbiakpawhna hmang nen report lakkhawm a ni a. Heta \anga a lan danin tunhnaia ruahsur nasa avang khan Serchhip District-ah chenna In luahlai leimin vanga chhia 3 awmin heng te hi Serchhip Chanmari Veng, Serchhip Saron Veng leh Lungkawlh khua ah pakhat \heuh a ni a, In saklai chhia pawh Serchhip Saron Veng-ah pahnih awmin heti hian In chhe vek hi 5 a awm a ni.

Heng In chhe vek bakah hian In luahlai pahnih te chu leimin avanga \hiah ngai a awm bawk a, leimin avanga In chim hlauhawm chhungkaw 7 ten an In chhuahsanin heng bakah hian leimin avanga dinhmun hlauhthawnawm a inngaia mahni In chhuahsan engemaw zat an awm bawk a ni. Serchhhip District chhunga In luahlai leh saklai chhe vek mi 5 te hnenah hian DC Office a\angin sawrkar a\anga \anpuina awm thei, Rs. 1,01,900/- chu hlan \heuh an ni tawh bawk a, hei bakah hian Lungkawlh khuaa chenna In chhia pakhat pawh Rs. 5200/- hlan an ni tawh bawk. Heng bakah hian ruahsur nasa avanga chhiatna thlenna hmun te hi sawrkar thuneitute chuan a hmunah tlawh nghal zelin an mamawh angin Silpauline pawh pekchhuah nghal zel a ni bawk.

Serchhip DC Office-a thawktute chuan inkalpawhna kawngpui leimin vanga ping report an dawn ang ang te chu thenfai hna thawh nghal zel a nih thu pawh sawiin, tun dinhmun ah chuan kawngpui tlanglo leh kalpawh theihloh khawpa ping a awm an hriatloh thu an sawi a. Ruahsur nasa kaihhnawih ah hian mihring nunna chan leh hliam tuar report an awmloh thu pawh sawiin, ruahsur nasa kaihhnawiha tuilian avangin chhiatna thleng engemaw zat a awm thu leh tunah hian report ala luh mek avangin tuilian in buh leh thlai chinna hmun a tihchhiat dan kimchang hi hriat theih ala nih loh thu an sawi bawk.