Mizo \obul chhuina Symposium neih a ni

Mizo Academy of Letters (MAL) leh INTACH (Mizoram Chapter) buatsaih Mizo \obul chhuina, ‘Symposium on Chhinlung’ chu nimin khan MBSE Conference Hall, Aizawl-ah neih a ni a. Art & Culture Minister, R. Lalzirliana chuan khuallian niin a hmanpui.

Symposium on Chhinlung-ah hian Art & Culture Minister, R. Lalzirliana chuan hnam ropui tak tak, hlawhtlinna leh hmasawnna kawnga sulsutu leh kan ngaihsan em em te ropuina innghahna chu an History leh Culture nghet tak a nih thu sawiin, An Culture-in nghet taka a phuarkhawm avangin hnam-ah an chiang a, an rinna thleng pawha vawngin hei hian an nihna a tinghet a, hnam anga inpumkhatna a siam sak a ni, a ti a. Thu leh hla hmanga kan hnam \obul leh history inhlanchhawng hnam kan nih avang leh ziaka vawn\hat kan neih ve loh avangin Mizote lo chhuah dan tak hi hriat chian a harsa a, ngaihdan leh rin dan inanglo tak tak a piang chhuak tih sawiin, “Kan tu leh faten chiang taka Mizo kan nihna, kan identity an hriatfiah theihna turin kan hnam \obul chhuina kawngah Vawiin a mi thiam rualte hi an pawimawh hle a ni,” a ti bawk.

He Symposium-ah hian MAL leh INTACH aiawhte bakah Mizo mithiam, thlahtu bul chhuina lama tui mi, thuziak lamah pawh sulhnu engngemawzat hnutchhiah tawhte an kalkhawm a. Mizo thawnthu leh \awngkaa thu inhlanchhawn a\anga Mizo lo chhuahna nia ngaih Chhinlung chungchang zirhoin Chhinlung hi a awm tak tak em tih te, engnge a nih chiah leh khawi hmuna awm nge tihte chhui zauvin sawihona hun an hmang a. |awng lama thiamna bik nei linguist-te, history lama tui mite leh China ram thlenga Mizo \obul chhuia lo vak tawh te pawh he hunah hian an tel a ni.