Mizoram hi ruihhlo tawlhna kawng a ni - END Minister

Excise & Narcotics Department Minister, Dr. K. Beichhua chuan Mizoram chu ruihhlo tawlhna kawng a nih thu a sawi.

June 26-a International Day Against Drug Abuse & Illicit Trafficking hman \hin puala nimin, July 1, 2019-a Aizawl Dawrpui Multipurpose Hall-a inkawm buatsaih a hmanpuina ah END Minister, Dr. K. Beichhua chuan Mizoram chu ruihhlo tawlhna kawng a ni tih hi sawiin, ruihhlo te hian min kal pel mai lova, min chamchilh a, nunna tam tak kan chan phah a, mi tam tak chhawr tlak lohin a siam a; chhungkaw tam tak te kan rum a ni, a ti a. He kan dinhmun \halo tak hi sawrkarin a hrechiang tih pawh sawiin, “Excise & Narcotics, Police leh a dang ten theihtawp an chhuah a. Central YMA leh tlawmngai pawl \henkhat ten nasa takin tha an thawh mek bawk a. Kan zia chho viau tawh nain kan tha erawh thlah chi a ni lova, nasa zawka \an kan lak a ngai a ni,” a ti bawk.

END Minister chuan ruihhlo hmansual leh dan kalha ruihlo tawlh dona chu state chhunga mipuite zawng zawng mawhphurhna a ni tih pawh sawiin, Ruihhlo hmansual chu ven theih a nih thu leh a hmangsual mekte pawh enkawl theih an ni tih sawiin, hemi kawnga hmalakna ah mi zawng zawng kan \anrual a ngai tih a sawi a. Kumin-a United Nations Office on Drugs and Crime (UNODC) World Drug Report 2019 in Jail chhung a zirchianna ah ruihhlo hmansual avanga awlsam taka kai theih HIV, Hepatitis C, Tuberculosis (TB) leh a dangte chu Jail tang te zingah a pung nasa tih hmuhchhuah a ni tih pawh sawiin, hei hi Mizoram sawrkar chuan a ngaih pawimawh thu leh Mizoram Social Defence & Rehabilitation Board (MSD&RB) kaltlangin nasa lehzuala hmalak a ni dawn tih a sawi bawk.

Substance Abuse chungchanga mithiamte sawi dan chuan thildang ang lo takin ruihhlo (Drug) bikah chuan Zawrh/tawlh (Supply) a tam chuan a duhtu (Demand) a pung daih thunga . Chuvangin Ruihhlo tawlhte na taka hrem an nih theih nan mipuite \anrual tlan a pawimawh ber a ni, an ti a. Magnitude of Drug Use in India 2019 in zirchianna ang chuan Opiate Drug hmansualah Mizoram chu India ramah a sang ber a. Sedative Drug Abuse-ah pawh a sang ber zinga mi a ni leh bawk a. Mizoram chhunga ruihhlo ngai zinga 25% chiahin inenkawlna hmunah an inhriattira, a dang 75% hian inenkawlna hmun emaw, anmahni \anpuitu tur emaw an pan lo a ni.

International Day Against Drug Abuse & Illicit Trafficking hi kum 1986 a\ang khan June 26-ah hman \hin a ni a, kumin hian remchan zawkna avangin Aizawl-ah chuan nimin khan hman niin he hun hi ruihhlo dona kaihhnawih sawrkar Department leh pawl hrang hrangte huaihawta hman a ni.