Film siam inelna ah lawmman semna neih a ni

Mizoram sawrkar buatsaiha Documentary Film Competition 2019 lawmman semna chu nimin khan Aizawl-ah neih niin I&PR Minister, Lalruatkima chuan khuallian niin a hmanpui a. “Dampa Tiger Reserve” tih thupui hmanga lemchan chuan lawmman pakhatna a dawng a ni.
Documentary Film Competition 2019 lawmman semna hunah hian I&PR Minister, Lalruatkima chuan tunlai \hangtharte zingah ziak ai mahin milem che theiin rilru a la a, thinlung a hneh hma bik tih sawiin, Film siam \hin te chu kan ram mawina te, Mizo nun zemawi tlawmngaihna te, chhiatni \hatni-a kan intuamhlawm dan te leh Mizo nunphung leh culture khawvel hriata phochhuak tura theihna nei Film siam kawngah \an la lehzual turin a chah a. Film hmangin mi thinlungah ram kan la thei tih sawiin, sawrkar pawhin a pawimawhzia a hriat avangin Ailawng-ah Film City din tura ruahmanna siam a nih thu leh Mini Theatre sak mek a nih thu a sawi bawk.
He hunah hian Khual zahawm, I&PR Director, Lallianpuii chuan tun \um Documentary Film intihsiak hi Mizoram Film Forum member chauh ni lo, Mizoram chhunga hetiang lama tui mite zingah a theih anga zau-a puandarh a nih thu a sawi a, Film siam hautak dan ngaihtuahin he intihsiaka Film 24 zet a lut chu lawmawm a tih thu a sawi bawk.
Documentary Film Competition 2019-ah hian Lalzawna Pachuau Film siam 'Dampa Tiger Reserve' tih chuan lawmman pakhatna dawngin Napolean RZ. Thanga siam, 'Bairabi - Zophai, Where we bled for our land' tih chuan lawmman pahnihna a dawng a, TC. Vanlalzauva siam 'Khaw-lailung Model Village' chuan lawmman pathumna a dawng bawk. Heng bakah hian David M. Thangliana siam 'Climate Change', Zohmangaihi siam 'No Plastic', F. Lalhmingchhuanga siam 'Kawtchhuah Ropui', KC. Zoherliana siam 'Bahadur Ladka', H. Lalsangzela siam 'Mizo Film Kungpui', HC. Rodinmawia siam 'Nungchate Nunphung' tih leh K. Romuana siam 'Mizo Videographer' te pawhin lawmman an dawng bawk.

Comments

Chhiar Hlawhte

Youth Icon Top-50 thlang

PAN CARD an tih teh fo hi - Laldinpuia