Rualbanlote ni hmang

Mizoram Presbyterian Kohhran chuan nimin khan Kohhran ni pawimawh ‘Rualbanlo te Ni’ an hmang a, thupui atan ‘Rualbanlote chanvo tha siam sak’ tih hmangin he ni pual hian thuchah ngaihthlak a nih bakah Rualbanlote pualin thilpek lakkhawm a ni bawk.
Kum 1996 Synod Inkhawmpui chuan Rualbanlote Ni hman relin Synod Executive Committee chuan a bawhzui a, June thla Pathianni vawi thumnaa hman tura relin kum 1998 atangin Nilai leh Beihrual Thupui Bu-ah telh a ni a. Lal Isua rawngbawlna chhunzawma rualbanlote ngaihsak zel theih nan Kohhranin he hun hi a hmang thin a ni.

Kum 2011 chhiarpui-ah khan Mizoram-ah rualbanlo mi 15,160 an awm a, an zinga mi 7,800 chauhin Rualbanlo te tana siam, UDID Card an nei a, hamthatna chi hrang hrang dawng turin UDID Card hi neih ngei a ngai a ni. Tun dinhmun ah Mizoram-ah Rualbanlo sawrkar hnathawk mi 106 an awm mek a, heng te hi Group A atanga Group D thlengin an ni.