MPC in ZPM nena an thawhhona a tawp thu puang; MLA leh Party hruaitu \henkhat ten hriatpui lo thung?

Mizoram People's Conference (MPC) chuan Zoram Peoples Movement (ZPM) nena an thawhhona a tawp tih Inrinni khan Aizawl Press Club-a thuthar thehdarhtu te hmaah an puang.
Thuthar thehdarhtute an kawmna hunah hian MPC Treasurer, V. Lal\hazuala chuan ZPM chu Registered political party a nih tak avang leh MPC pawh Registered Party an nih avangin 'automatic' in an thawhhona chu a tawp ta tih a sawi a. MPC chu \hiah-a ZPM a inchhunluh tumna a awm loh thu a sawi bawk. ZPM-a thawhhona thuthlung vuantute tum ber chu Congress ni lo, MNF nilo, kalphung thara Sawrkar \ha, mipuite sawrkar din a nih thu MPC Treasurer chuan a sawi a, mahni pawl \hiat kher lova 'Grand Alliance' anga an thawhhona chu a hlawhtling thawkhat hlea an ngaih thu leh MLA Bial riat-a an chak thei chuan an thawhhona in hlawhtlinna a thlen theih zia a tichiang-a an ngaih thu a sawi bawk.
MPC chuan ZPM anga an thawhho chu rem tawh lo mahse Grand Alliance/Movement/|angrual anga hmalak chhunzawm zel chu ram siam\hat nan a \ulin a pawimawh an la tih thu leh chumi tur chuan inbiaka thuthlung thar sign a ngai tih pawh an sawi a. He hi MPC Party maiin amaha tihhlawhtlin theih a nih loh avangin, ZPM te nena \ha taka inbiakhona leh insiamremna a ngai a, chumi tur chuan MPC chu engtiklai pawhin an inhawng reng tih a sawi bawk.
Hetianga an thawhhona a tawp takah chuan MPC mi lo ni tawh MLA 3 dinhmun zawhna chhangin, MPC Treasurer chuan, Independent MLA an ni a, ZPM-ah pawh awm sela Independent-a Nomination File an nih avangin ZPM party emaw, MPC Party pawh an zawm thei chuang lo niin a sawi bawk.
Hetihlai hian MPC party thupuan chungchangah hian MPC (ZPM) party a\anga MLA thlantlin, Aizawl West-III bialtu VL. Zaithanzama chuan engmah an hre ve lo tih a sawi a, “He thilah hian min rawn lem lo a, engmah min hrilh loh bakah kan party Vice President pawhin engmah a hre lo a ni,” a ti a. Tunhnaia MPC Party Treasurer in ZPM Chairman hnena ZPM-a an palaite leh Committee peng danga awmte Term a tawp tih hriattirna lehkha MPC hruaitu thlan tharte \hukhawm thuchhuak anga a thawn hi MPC Vice President, Lalthansanga (Chate-a) chuan a hriatpui loh thu thuthar thehdarhtute zawhna chhangin alo sawi tawh bawk a ni.

Comments

Popular posts from this blog

PAN CARD an tih teh fo hi - Laldinpuia