FOCUS Serchhip District hnuaia CAHW te tan an hnathawh dan tur zirhona neih a ni

Nimin khan Serchhip-ah AH&Vety Department buatsaihin FOCUS Serchhip District hnuaia Community Animal Health Worker te tan an hnathawh dan tur chungchang zirhona neih a ni a, he zirhona hun hi District Bawrhsap, Sangchhin Chinzah chuan hmanpuiin FOCUS hmalakna chu kuthnathawktute tana thil \ha a nih thu a sawi.

District Management Unit (DMU), Fostering Climate Resilient Upland Farming System (FOCUS) Serchhip District in Serchhip District chhung khawtin a\anga AH & Vety Department aiawha ranvulh lama hmalakna buaipuitu tura thlan, Community Animal Health Worker (CAHW) te tan training hmasa ber Serchhip P&E Veng YMA Hall-a an buatsaih ah hian District Bawrhsap leh District Management Committee-FOCUS Chairman, Sangchhin Chinzah chuan FOCUS hmalakna tura ruahmanna te chu kan rama kuthnathawktute tan thil \ha lutuk a nih thu sawiin, he huna tel te chu an thil zir te anmahni khua \heuh ah mipuite zirtir lehtu tur an nih thu a sawi a. Sawrkar in NLUP kaltlanga hma a lakna ah sawrkar ruahman ang lo-a hma la tam tak an awm nia a lan thu pawh sawiin, pawi a tih thu a sawi a. FOCUS Project hnuaiah beneficiaries turte chu uluk leh felfai taka thlan a nih dawn tih sawiin, a tui leh a tithei tur nia beisei te zel duhsak an nih dawn thu leh chung miten an hlawhtlinpui ngei theih nana lo thawhpuia lo kaihruaitu turte an nih avangin phur takin, thiam bel tuma an hnathawh tur te zir turin a chah a. “Kan ram tan thil \angkai tak tithei dinhmunah in ding mek a ni,” tiin Mizote chu Vawk sa ei nasa tak, amaherawh chu mahni ei tur pawh tharchhuak theilo leh rampawn a\anga chawlut kan nih thu sawiin, kan eitur tal-a intodelh tura \an kan lak a \ul thu a sawi bawk.

FOCUS-a State Project Director, RK. Nithanga chuan he hunah hian FOCUS kalphung leh an hmalak dan te sawiin, FOCUS chu kum 6 chhung kalpui tura ruahman a nih thu leh tunah hian a kum 2-na kalpui mek a nih thu sawiin, sawrkar tan khaw tinah Vety Doctor leh VFA dah vek theih a nih loh avangin an aiawha ran hriselna enkawl turin Community Animal Health Worker te chu dah an nih dawn thu a sawi a. Community Animal Health Worker te chu AH & Vety Department-a mithiam ten zirtirna an pek tur thu leh an term a tawp hnuah pawh anmahni khua \heuh ah ran enkawlna hna thawkin a enkawlna man an lak chu eizawnna atan pawh an hman theih dawn thu a sawi bawk.

Serchhip DVO, Dr. C. Zarzokima kaihhruai he hunah hian R. Vanlalruati, Gender & Community Institution chuan Community Animal Health Worker (CAHW) te hnathawh tur hrang hrang leh an zawm turte he hunah hian sawiin, FOCUS chu Agriculture lama hmalakna ni mah se ranvulh chu Agriculture nena inzawm tlat a nih avanga telh ve a nih thu a sawi a. CAHW te chu ranvulhtute harsatna sutkianpui tur leh lo invenna tura thawktu tur an nih thu pawh sawiin, an hnathawhna hmanrua te pawh a \ul anga pek an nih dawn thu a sawi a. CAHW atan hian Hmei-chhia 10 lak an nih thu a sawi bawk.

FOCUS Project hian Nodal Agency Department Agriculture, AH&Vety, Soil & Water Conservation leh Horticulture te neiin loneitute tihhmasawn leh tlangram lo neih (Jhum Cultivation) tih danglam a, sik leh sa chhe zel tur ven hna ni telin hmalakna a kalpui dawn a, International Fund for Agriculture Development (IFAD) sum hmanga thawh tur niin District pali - Champhai, Kolasib, Serchhip leh Mamit-a RD Block 11 a\anga khaw 272-a mihring 3,22,500 tuam tum a ni a. Serchhip District chhunga hian khaw 42 ah hmalak a ni a, Project hi kum 2024 thleng awh tura ruahman niin, Project kalpui nan hian US Dollar maktaduai 79.30 (Cheng vbc. 539.272) ruahman a ni. Nimin a training hawnna ah hian C. Lalnithanga DPM FOCUS chuan lawmthu sawina hun a hmang bawk a ni.