Durtlang-a BSUP In chim ah mi 3 in nunna chan

Niminpiah tlai dar 6:00 leh dar 6:30 bawr vel khan Durtlang Leitan Ramthar Veng-a BSUP (Mirethei chenna In) Block \henkhat chu a chhak leiminin tichhiain mi 3 in nunna an chan a, mi 8 in hliam tuarin hliam tuar zinga 3 te chu Presbyterian Hospital, Durtlang-ah enkawl mek an ni.

Thudawn danin Durtlang Leitan Ramthar Veng-a Mirethei chenna In tia sawi \hin, Basic Service to Urban Poor (BSUP) Complex-a Building 1, 2, 3 leh 4 hi niminpiah tlai thim hma deuha ruahsur avanga a chhak leimin in a delh a, Building No. 4 hi a chhawng hnuai ber a awp a, he In chhia tuartu chhungkaw zat hi Block 2-ah 6, Block 3-ah 5, Block 4-ah 7, an vaiin chhungkaw 18 niin a bulhnaia awm te chu hmun him lamah sawnchhuah niin MC Hall, Durtlang-ah dah laiawk an ni.

He vanduaina thlenna hmunah hian nunna chan mi 3 awmin heng mite hi Lalnunfeli (13) D/o Lalngaihliani, Sainghinglovi (52) W/o V. Lalrodawnga leh Lalpeksanga (8) S/o Lalchuailova te an ni a, ruang pahnih nizan hmasa-ah lakchhuah nghal niin Lalpeksanga ruang hi nimin zing dar 7:10 khan lakchhuah leh a ni a. Postmortem tih anih hnuah nimin chawhnu khan Durtlang Leitan YMA Hall-ah Lalnunfeli leh Lalpeksanga te thlahna hun hman niin Durtlang Leitan Thlanmual-ah vuiliam an ni a. Sainghinglovi ruang hi Hunthar Veng-a a chhungten lain nimin chawhnu khan Hunthar veng-ah vuiliam a ni bawk.

He vanduaina thlenga hliam tuar damdawi In panpui pariat zingah a \hen chu First Aid pe-a chhuahtir niin an zinga na deuh mi 3- Lalchuailova (50), Lalrohlua (30) leh V. Lalrinkimi (13) te chu Synod Hospital Casualty panpui an nih hnuhah admit zui an ni a, dinhmun hlauhthawnawm lutuk an ni lo nia thudawn a ni a. Hliam tuarte sawi danin lei tawlh tur hian thawm a nei lawk lem lo a. Mak tak maiin chhungkaw pakhat chu leiminin an chenna a nawrna ah nawr chhuakin an him hlauh bawk a ni. 

He vanduaina a thlen thu hriat a nih veleh mi tlawmngai ten vanduaina thlenna hmun hi pankhawm nghalin chhanchhuah leh chhawmdawl hna thawh nghal a ni a, bialtu MLA, Vanlalhlana bakah sawrkar hruaitu pawimawh leh Minister, Central YMA hruaite leh tlawmngai pawl hrang hrang ten helai hmun hi \hutchilh nghalin In block \henkhatte hi chim mai thei leh che reng anih avangin duh angin chhanchhuah hna thawh theih a ni lo a. Aizawl District Disaster Management Authority-a Coordinator, Laltinkimi chuan Quick Responce Team in hliam leh ruang zawn hna ngawrh taka darkar 12 chhung an thawh hnuah nimin zing dar 7:10 khan Lalpeksanga ruang chu phawrhin Official-a ruang zawn hna hi tihtawp zui nghal a ni a. BSUP Building chim chhan leh a bulhnaia building chim ve lo te chu a him leh him loh nimin khan enfiah nghal a ni bawk.