Session lungchhiatthlak ber a ni - Chatea

ZPM hruaitu leh MLA lo ni tawh, Lalthansanga (Chatea) chuan tunhnaia Assembly Session neih zawh tak chu Session lungchhiat thlak ber niin a sawi.

Nimin a ZPM in an Office-a Chhung Inkhawm an neih ah Chatea hian thu sawiin Opposition MLA-te zawhna, Mizoram ramri chungchangah Home Minister-in, “Ramri buai kan neih ka hrelo,” tia a chhang chuan kan sawrkar in Mizoram ramri chungchangah rilru an seng lo hle tih a chiang em em tih a sawi a. “Assam (Cachar) nena ramri buai chinfel loh kan neih hi MNF sawrkar hian a hriat loh tlat avangin, Mizoram ramri dik tak hauh tur hian Mizoram mipui tan rintlak an nih loh zia tilangtu a ni,” tiin “Congress sawrkar chhunga kan zirlai hruaitute Assam Police kut an tawrhna te kha MNF sawrkar hian a theihnghilh ta em ni?” a ti bawk.

Hei bakah hian Chatea chuan, ZPM MLA ten Mizoram-a ramdang mi (Foreigner) awm zat an zawhna Home Minister vekin a chhanna a “Rohingya raltlan 200 chuang vel bak ramdangmi Mizorama an awm kan hre lo,” tia a chhang chuan Chakma Autonomous District huamchhung a Chakma Foreigner tam tak awmte MNF sawrkar-in dapchhuah leh thawnkir an tum loh zia lanchian tirna niin a sawi a. “MNF Party leh sawrkar hian Mizoram leh hnam tan hian Policy puitling leh mumal engmah nei lovin, an arkhawthim dai mai mai a ni,” a ti bawk.

Chatea hian ZPM-a pawl hrang hrangte pawl pakhata inchhunglut turin chak takin hma lak mek a ni tih pawh he hunah hian sawiin, Election Commission of India (New Delhi)-ah Party Registration chingfel turin an hruaitute an thang mek tih a sawi bawk.