YMA ten Leadership Training neiin ruihhlo do an zirho

Serchhip Sub-Hqrs. YMA buatsaihin Inrinni khan ‘Leadership Training leh Ruihhlo Do Awareness Campaign’ neih a ni a, he hmalakna hi Sub-Hqrs. YMA huamchhunga Group YMA-ah te pawh la neih chhunzawm tura ruahman a ni.
Serchhip Sub-Hqrs. YMA Conference Hall-a he hun hman hi Sub-Hqrs. YMA Training & Youth Affairs Committee Chairman C. Lalhminghlua chuan kaihruaiin Serchhip Sub-Hqrs. YMA President, Kawlthuama chuan kumin-a Sub-Hqrs. YMA Rorel Inkhawm-a Agenda rawtna lut zingah Leadership Training buatsaih rawtna chu SEC in Training & Youth Affairs Committee te hma la tura a ruat anga he hun hi buatsaih a nih thu a sawi a, tun tumah hian Serchhip Town chhung leh Direct-a awp Branch te tan buatsaih phawt niin Sub-Hqrs. YMA huamchhunga Group pathum-ah te pawh la neih chhunzawm zel tum a nih thu a sawi a ni.

‘Leadership Training leh Ruihhlo Do Awareness Campaign’ ah hian chawhma lamah Resource Person atan Vanneihtluanga (Aizawl) chu hman niin YMA Hruaitu nihna leh mawhphurhna te, YMA inkaihhruaina dan dik leh fel chungchang te, Hruaitu tha ni tura hriattur pawimawh hrang hrang te, 'Kohhran leh YMA' leh 'Sawrkar leh YMA' chungchang te sawiin, sawihona neih zui a ni. Chawhnu lamah Serchhip District Legal Services Authority bultumin,Ruihhlo Do Awareness Campaign neih chhunzawm a ni a, Resource Person atan Rosangpuia, Addl. Public Prosecutor (Aizawl) leh Lalrosanga Colney, Addl. Public Prosecutor (Serchhip) te hmangin Ruihhlo dona kawnga hmalak dan tur leh ND&PS Act hnuaia hriat tur pawimawh hrang hranga zirho niin YMA ten hma an lakna a an hriat tur pawimawh hrang hrangte sawiho a ni bawk.

Hei bakah hian Serchhip DC Office atangin SDC, Vanthangpuia chuan ‘Vantlang Viltu Apps’ chungchang zirtir bawkin mipui ten tangkai taka he Apps an hman theih dan turte zirho a ni bawk.