Sampoornata Abhiyan Award semna hun hmang

NITI Aayog hnuaia Aspirational Block te hmasawnna tura inelna ‘Sampoornata Abhiyan’ a Ngopa Block atanga hnathawk thate lawmpuina hun ‘Sampoornata Abhiyan Samman Samaroh’ chu nimin khan Saitual Auditorium-ah neih a ni.

Nimin-a he hun hman hi Minister F. Rodingliana chuan hmanpuiin NITI Aayog-in Aspirational Block te hmasawnna tura inelna- Sampoornata Abhiyan a buatsaihah Ngopa RD Block chu a titha ber leh Mizorama NITI Aayog tehfung/parameter paruk (6) te tihlawhtling vek thei Aspirational Block awmchhun a ni chu lawmawm a tih thu a sawi a. He dinhmun thleng tura kaihruaitu District Bawrhsap leh a thawhpuite, BDO leh Line Department dang Health, ICDS leh Agriculture-a an hotute leh Frontline Workers te chu a lawmpui thu sawiin, an thawhrimnate avangin lawmthu a sawi bawk.

Minister chuan Ngopa Block chu Block hnufual leh chawikan ngai, Aspirational Block a ni reng tur a ni lo tih pawh sawiin, Ngopa RD Block-a khaw tinah hmundang aia thlai tha duh bik leh tui bik te chu ching uar a, hlawk zawka hralh sum-a chantir turin hma an la mek tih a sawi a, Tuisa Link Road te pawh siam mek niin, tun dinhmunah Mimbung, Teikhang leh Hrianghmun atanga pan theihin Link Road zau tak an lai zo tawh tih a sawi a, tihchangtlun zel an tum thu a sawi bawk a. Ngopa damdawi In (CHC) leh Quarters sakthatna tur pawisa sawrkar atang a awm tawh tih sawiin, hna chu tan mai theih a nih thu leh Mizoram Sawrkar chuan District tinah ICU Khum dah vek turin hma an lak thu a sawi bawk.

He hunah hian tun thla ni 30 thleng awh tur tualchhung kutkawih phochhuahna, ‘Aakanksha Haat’ neih chhunzawm a ni a, Self Help Group te leh tualchhung mi ten an thilsiam te chu mipui lei theih turin an phochhuak a. Hei bakah hian DC Office atang Aadhaar update, Income, Residential, Tribal Certificate, etc te a thlawnin a siamtir theih a, Health department in BP leh Blood sugar te a thlawnin an check sak bawk a ni.

Mamit-ah pawh nimin khan Siamliana Hall-ah Sampoornata Abhiyan Award semna hun hi hman a ni bawk a, he hun hi Bialtu MLA Er. H. Lalzirliana chuan hmanpuiin Sawrkar Laipui chuan Vision 2047 chu nasa taka kalpui mekin kum 2047-ah chuan India ram chu Developed Country a nih theih nan tan a la mek tih a sawi a, “Mamit District pawh Aspirational District ni mahse zirna lamah te, hriselna leh in enkawlna lamah te leh kawng hrang hrangah hma kan sawn zel a, entawntlak kan ni ze,” tiin hemi kawnga thawktute chungah lawmthu a sawi bawk. Kar khat chhung awh tur ‘Aakanksha Haat’ pawh MLA hian hawng nghalin thil siam bakah free medical check up, SBI leh Aadhar services te a thlawna tih theih a ni bawk.