Mizoram State Super Specialty Cancer & Research Centre din tur chungchang sawiho a ni

Japan International Cooperation Agency (JICA) sum hmanga ‘Mizoram State Super Specialty Cancer & Research Centre’ sak tur chungchang chu nimin khan Chief Minister Lalduhoma hovin CM Conference Hall-ah sawiho a ni.

Mizoram hi India rama Cancer hmuhchhuah tamna ber (highest incidence) a ni a, kumtin India ramah mihring nuai khat zelah mi 98.5 chu Cancer vei thar ang an nih laiin Mizoram-ah chuan mihring nuai khat zelah mi 189.7 ten an vei thar thin anga chhut a ni a. Cancer tuar damlo, enkawl tura phai lama refer pawh an tam thin a, sawrkarin sum tam tak seng thinin Mizoram dinhmun hi India rampum nena khaikhinin a dangdai bik lehzel a, India rama Cancer langsar panga te indawt dan chu Hnute, Chawkawng, Cervix, Chuap leh Esophagas niin Hnute, Chawkawng leh Cervix dapchhuahna (screening) tur sum hi Central Fund a awm a. Mizoram a Cancer langsar pangate indawt dan erawh chu Esophagus, Pumpui, Chuap, Hnute leh Cervix te niin Central Screening Fund hman theih lohna pathumah Cancer kan vei nasa bik a. Hetiang dinhmuna ding kan nih lai hian Cancer tuartute enkawlna hmun bik, Comprehensive Cancer Centre kan la nei si lova. Hei vang hian Mizoram State Super Speciality Cancer & Research Centre din hi sawrkar chuan a tulin a hria a. Zemabawk-a Cancer Hospital ram chu tinzawn a ni.

Mizoram State Super Speciality Cancer & Research Centre sakna tur sum hi Japan International Cooperation Agency (JICA) loan beisei niin cheng vbc. 700 senga din tum a ni a, chung zinga cheng vbc. 560 chu loan puk tur a ni a. DPR hi Public Health Foundation India ten an siam a, kum 2023 February thlaah khan Loan Agreement hi Government of India leh JICA lam ten an ziak a. Loan interest rate hi 1.5% niin kum 2033 atanga rulh tan tur a ni ang. Ruahman dan chuan he Centre-ah hian Cancer Hospital Building, Nuclear Medicine Block leh Staff Quarters te sak an ni anga. Equipment lamah PET Scan/SPECT Scan, MRI 1.5 Tesla, CT Scan 128 Slices, PACS, RT-PCR/NGS te leh a dangte a awm ang. Heng bakah hian a thawktute buatsaihna lam te leh Cancer chungchang zau taka mipuite hnena zirtirna kalpui thlengin a awm dawn a ni.

Project hi hlawm hrang hranga thendarh a nih avangin a indawta kalpui a ngai a. Project Management Consultant atan Mukesh & Associates - Oriental Consultants Global Co, Ltd ruat an ni a, Soft Component leh Capacity Building kalpui turin Nippon Koei India Pvt ltd thlan an ni.

Nimin-a thutkhawm ah hian Adviser to Chief Minister TBC. Lalvenchhunga leh Health Department-a Commissioner & Secretary H. Lalengmawia IAS bakah Health Department Official pawimawh te an tel a, he hunah hian hnathawktu tur Company tha leh rintlak ngei thlanchhuah a nih theih nan hmalak zui dan tur a ruahman a, a bawhzui tura ruatten a ranglamin meeting an ko leh tura ruahman a ni bawk.