Badminton-ah Serchhip chetha

Mizoram Badminton Association Official Senior Championship 2025 khelh zawh takah New Serchhip Badminton Club player ten lawmman hlu tak tak an vawchhuak.

July 22 atanga Mizoram Badminton Centre, Zuangtui-a neih ‘Yonex-Sunrise PC. Gabriel Lalliansanga Memorial MBA Senior Official Championship 2025’ hi Zirtawpni zan khan khelh zawh niin inelna ngaihhlut ber, Men's Singles Final-ah Serchhip khua ve ve leh New Serchhip Badminton Club (NSBC) tana khel ve ve inhmachhawnin Vanlalmalsawm-zuala s/o Lalkhawpuia (L), Serchhip Vengchung chuan Malsawmhlua s/o Albert Lalnunhlima, P&E Veng, Serchhip chu 21-23, 21-17, 21-14 a hnehin a Champion a, heng mi pahnih te hi Under-19 player ve ve niin Senior Category-a vawi khat final an luhna ve ve a ni bawk a, hmabak eng tak an nei chho mek a ni.

Hetihlai hian Hmeichhe Doubles-ah pawh Serchhip Ramthlun Veng-a cheng leh New Serchhip Badminton Club Player Lalrempuii D/o Albert Lalrosanga (L) te an Champion bawk a, Lalrempuii hi H. Lalrinhlui (CSC) nen inkawpin Final-ah hian Zoramthari leh Ramngaihzuali, SPBC te tangdun chu hnehin an Champion a ni. Serchhip tleirawl Lalrempuii hi Mizoram Badminton Association chuan kumin April thla khan ‘Player of the Season’ atan lo thlang tawhin thla hmasa lawk khan All India Junior Ranking Tournament-ah pawh Medal a lo la tawh a ni.

Yonex-Sunrise PC. Gabriel Lalliansanga Memorial MBA Senior Official Championship 2025-ah hian Hmeichhe Singles-ah H. Lalrinhlui, Chanmari West, tuna Chanmari Shuttlers Club tana khel mek chuan Tirza Lalremruati, Kolasib Hmar Veng, Sihphir Badminton Club tana khel mek hnehin a Champion a. Men's Doubles-ah Saitluangpuia Sailo leh Sainun-mawia Sailo (unau), SPBC te chu Champion in Sainunmawia Sailo hi Zoramthari nen Mixed Ddoubles-ah an Champion bawk a ni.