Sipai chhuahsan ram hman tangkai dan tur sawiho

Aizawl khawpui-a Assam Rifle chhuahsan ram te hman zui dan tur ngaihtuahtu Advisory Committee te chu nimin khan an Chairman leh Chief Minister Lalduhoma hovin an thukhawm.

He thutkhawm CM Conference Hall-a neih ah hian Chief Minister chuan sawrkarin a duh dana thutlukna a lo siam mai chu thaa a hriat loh avangin pawl hrang hrang aiawh telna Advisory Committee hi din a nih thu leh tel tur awm ang chu an tel kim thawkhatin nia a hriat thu a sawi a. Hemi hnu hian UD&PA Department changtu Secretary Lalmalsawma Pachuau chuan Master Plan an ruahman chhin sawifiahin, Culture & Nature Centre, khawvel khawpui changkang danga an lo neih thin ang ngaihtuah ran chunga an duan a nih thu a tarlang a. A ram zawng zawng zatve aia tam (52.57%) chu hmun hring, mipuite tana len khaw thawn theihna turin an ruahman thu a sawi a. Hei hi Advisory Committee hian an sawiho a, a tul anga la sawi zui zel a ni ang.

He thutkhawm ah hian Mizoram Synod atanga lehkha hmuh te, Assam Rifles ram chhunga mimal ram nei Court thubuaia lut mek (pending case) chungchang te, AMC, GPC Mizoram State Assembly, Health, P&E leh PHE Department atanga dilna lo lutte chu pharh a ni a. Aizawl Civil Hospital Complex tihzauh nana Aizawl Police Station awmna chu hman a nih theih nan Assam Rifles ram chhuahsanah hian Aizawl Police Station hi dah ni se tia Health Department dilna chu a thuphunga pawm (in principle) a ni a, zirchianna neih zui tur a ni ang. Heng bakah hian PHE lDepartment in tui dahkhawlna hmun pathuma siam an dilna pawh an siam dan tur design te hriatsak hmasak nise an ti a. Committee hian chhuahlam pangah hian kawngpui sial tha-a hriain PWD lamin an lo enfiah anga, mimal leh pawl hmunhma a khawih theihte zirchian a ni bawk ang.