MLA Lalrintluanga Sailo vuina hunah thu sawi

Dampa Bialtu MLA Lalrintluanga Sailo chu nimin khan Aizawl Luangmual-a an Chenna In-ah vuiliam a ni a, sawrkar hruaitute leh Political Party hrang hrang aiawh ten an ui thu a vuina hunah hian an sawi a ni.

MLA Lalrintluanga Sailo vuinaah hian ZPM Legislature Party aiawh leh House Leader a nihnain Chief Minister Lalduhoma chuan thu sawiin, “Mizoram Legislative Assembly in debator tha a chan a ni,” a ti a. “Mizoram in Sitting MLA hi mi 10 kan chan tawh niin ka hria a. Vawiin-a kan vui mek Pu Lalrintluanga Sailo hi Legislator tha, debater ropui tak a ni. Ka nau a ni a, a hmingin kan ko mai, Pu kan belh ngai lo. Kan nupa hi u angin min en a, kan ngaina em em a ni. Kum 1993-a Bilkhawthlir Bial a ka zuk din khan ka campaign Chairman a ni tluan zak a, kan riakdun zel thin. Tunah kan han MLA dun a, Session-a kan han che vel te hi mi inhal tak emaw min ti mai thei. Mahse a ni lo, kan innel em em zawk a ni,” a ti a. “A nupui fanaute lo thlaphang lo ula, thian tha tam tak in nei tih hria ang che u. Sawrkar pawhin a tih theih apiang a ti dawn a ni,” a ti bawk.

He hunah hian Leader of Opposition Lalchhandama Ralte, MNF Legislature Party Leader pawhin Lalrintluanga Sailo ruang chunga thusawi a ngai ta mai chu a rilru a nat thu a sawi a. Lalrintluanga Sailo chu an thawhpui, mi zahder thiam, a tul huna hmatawnga tang thin, a tul huna midangte dawmkang tlat thin a ni tih sawiin, Mi thiam, tunlai khawvel thang leh hmasawn tak mila inbuatsaih zel thei a nih thu a sawi a, ram rorelna In-ah pawh a thawh tam hle niin a sawi.

Deputy Speaker Lalfamkima pawhin Lalrintluanga Sailo nen hun reilote ram rawngbawl hna an thawhho hnuin pa tha tak, rilru zau, mi khawngaih thei leh mite tanpui thin a nih thu a sawi a. Assembly Session la hman zel turah pawh a hmun ruak a zau dawn hle tih a sawi a. Delhi-a cham mek Speaker Lalbiakzama’n a thlahna thuchah a sawi bawk. Anni bakah hian Assembly-a Legislature party hruaitu dangte pawhin nimin a a vuina hunah hian thu an sawi a. MLA nilai boral a nih avangin Mizoram Assembly Secretariat-a Addl. Secretary Lalthangmawia chuan Mizoram sawrkari Lalrintluanga Sailo a sunna Gazette a chhiar chhuak a. House a a thusawi zat te a tarlang bawk.

Lalrintluanga Sailo vuina hunah hian MNF Party President leh Chief Minister hlui Zoramthanga pawhin thu sawiin Lalrintluanga Sailo vuina hun hman a ni ta mai chu mumang emaw tih mai tur a nih thu a sawi a. Hun rei tak atangin a hriselna a tlahniam tih sawiin, hetihrual hian mi chhel tak, a theih loh tura ngaih pawh a duty leh a zinna tura ruat te ti hlawhtling zel mi leh party tana mi rinawm, entawntlak leh party member te fuihna atan pawha a hman thin a nih thu a sawi a ni.