Peerless Hospital ten MUHCS an zawm thu an sawi

Kolkata khawpuia Damdawi In pakhat, Peerless Hospital chuan Mizoram Universal Health Care Scheme (MUHCS) zawmin, Mizoram sawrkar an rinngam bakah Mizo mipuiten an hlawkpui ngei an beisei tih an sawi.

Inrinni-a Aizawl Press Club-a thuthar thehdarhtute an kawmna ah Peerless Hospital Associate Vice President, Indrajeet Banerjee chuan Mizoram Universal Healthcare Scheme (MUHCS) hnuaia Empanelled Hospital an nihna thuthlung an ziah tawh thu sawiin, Kolkata leh Gauhati-a an damdawi In-ah te he Scheme a inziaklut te tan hman theih an nih thu an sawi a. Mizoram atanga damlo pantuten Kolkata-a an damdawi In khum 500 awmna leh Guwahati-a Peerless Hospital khum 250 awmna te chu MUHCS hnuaiah hian an hman theih thu an sawi a ni.

Peerless Hospital Senior Consultant Dr. Ashok Bandyopadhya chuan, Mizoram atangin damlo tam takin an Damdawi In an pan thin thu leh Mizoram Universal Health Care Scheme (MUHCS) an chhawr thei tih a sawi bawk a. An damdawi In chu hmanraw tha leh tunlai ber hmanna a nih thu sawiin, Lung lam natna, thazam lam kaihhnawih, Cancer, Ruh lam leh natna khirhkhan tak tak thlengin Mizoram mipuite tan pan theih an nih thu a sawi bawk.