'Akhil Bharatiya Shiksha Samagam 2025' neih a ni

Union Ministry of Education chuan National Education Policy NEP kum nga tlin pualin nimin khan 'Akhil Bharatiya Shiksha Samagam 2025' a huaihawt.

National Education Policy hi July ni 29, 2020 khan bul tan a ni a. NEP avang hian ramchhung zirna kalphung chuan bung thar kaiin, Insiamthatna leh ngaihtuahna thar nen ramchhunga zirna dinhmun siamthat chhoh mek a nih thu sawrkar chuan a sawi a ni. National Education Policy (NEP) 2020 kum 5 tlinna lawmna, 'Akhil Bharatiya Shiksha Samagam 2025' hi nimin khan PM SHRI Govt. Primary School II, Ngopa-ah Video Conferencing hmangin lo zawm a, he hunah hian zirlai nu leh pa te, Ngopa khawtlanga NGO hrang hrang hruaitute leh VC te an tel a ni.

National Education Policy (NEP) 2020 hnuaiah India ram zirna kalphungah hmasawnna langsar tak tak a awm a, hmalakna zingah by-heart system kalsanin thiamna tak tak neih theihna turin hmalak a ni a, Zirna kalphungah 5+3+3+4 System thar hman niin hei hian a taka tihchhinna atanga zirna (experiential learning) a ngaihpawimawh a. Hemi denchhen hian CBSE Board Exam-ah pawh zirlaite hriatthiamna dik tak tehna tur, Competency-based zawhna 50% telh a ni tawh a ni. Hei bakah hian bul tan zirna tihchakna turin NIPUN Bharat Mission leh Vidya Pravesh kaltlangin hmalak a ni a, Zirtirtute tihhmasawnna turin NISHTHA hmangin zirtirtu nuai 4 chuang training pek an ni tawh bawk.